Memlekettik qyzmette ıkemdi jumys kestesi kimder úshin engiziledi
«Qazirgi kezde biz mansap pen otbasy arasyndaǵy tepe-teńdikti saqtaý maqsatynda birqatar sharalardy qolǵa alyp jatyrmyz. Sonyń biri - kishkentaı balalary bar memlekettik qyzmetshiler úshin ıkemdi jumys kestesin engizý. Sebebi búginde Qazaqstanda memlekettik qyzmetshilerdiń jartysynan kóbi - áıelder. Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııasy atalǵan bastamamyzdy qoldady», - dedi A.Shpekbaev QR Prezıdenti janyndaǵy Adam quqyqtary boıynsha komıssııanyń keńeıtilgen otyrysynda.
Aıta keteıik, QR Memlekettik qyzmet isteri jáne sybaılas jemqorlyqqa qarsy kúres agenttigi óz qyzmetkerleri úshin ıkemdi jumys kestesin engizýdi josparlap otyr. Atalǵan bastama oń nátıje berse, ondaı keste barlyq memlekettik organdarǵa taratylady.
«Ózgeristerdi ózińnen basta» baǵdarlamasynyń bas menedjeri Shyńǵys Tóregeldınniń aıtýynsha, jumys kestesin ózgertýge qatysty arnaıy saýalnama júrgizilgen bolatyn. Sol kezde agenttik qyzmetshileriniń 70 protsenti jumys kestesin ózgertýdi surady. Bireýler jumystyń bastalý ýaqytyn sál shegerýdi ótinse, endi bireýler túski úzilisti uzartý qajettigin jetkizdi. Osyǵan baılanysty agenttik qyzmetshileri úshin jumys ýaqytyn ózgertý týraly sheshim qabyldandy. Alaıda 8 saǵattyq jumys kúni saqtalady. Sosyn atalǵan bastamany ázirshe pılottyq joba úlgisinde qolǵa alynady.
«Biz mektepke deıingi jastaǵy jáne bastaýysh synypta oqıtyn balalary bar agenttik qyzmetshileri úshin jumys kúnin 9:30-ǵa belgileýdi usyndyq. Sonda 1,5 saǵattyq túski úzilisti sanaǵanda olardyń jumys ýaqyty 19:00-ge deıin sozylady. Sol sııaqty túski úzilisti uzartýdy suraǵandar qosymsha jarty saǵat alsa, olardyń jumys kúni de 19:00-ge deıin bolady. Qalǵan qyzmetshiler úshin qoldanystaǵy jumys kestesi (9:00-18:30) qala beredi. Atalǵan ózgerister jumys tıimdiligine kedergi jasamaı, ujymdaǵy moraldyq-psıxologılyq klımatqa oń áserin tıgizedi dep oılaımyz. Bul bastama agenttikte, sondaı-aq QR Investıtsııalar jáne damý mınıstrliginde synaqtan ótedi. Biz ony qyrkúıek aıynda bastaımyz», - dedi Sh.Tóregeldın Astanada ótken baspasóz máslıxatynda.
