Memlekettik qyzmetshiniń mansap jolyndaǵy ósýi adamdardyń talantymen, kásibı daıyndyǵymen tikeleı baılanysty - Elbasy
ASTANA. 17 qazan. QazAqparat - Memlekettik qyzmetshiniń mansap jolyndaǵy ósýi adamdardyń talantymen, kásibı daıyndyǵymen tikeleı baılanysty. Bul týraly búgin «A» basqarýshy korpýsy memlekettik qyzmetshilermen keńes ótkizgen Elbasy Nursultan Nazarbaev aıtty.
Memleket basshysy óz sózinde Qazaqstan TMD aýmaǵynda eń birinshi bolyp «Memlekettik qyzmet týraly» zań qabyldaǵandyǵyn, eldiń 2030 jylǵa deıin arnalǵan tarıhı strategııasy merziminen buryn júzege asyrylǵandyǵyn basa aıtty. «Bizdiń memlekettik apparat kásibı, jaýapkershilikti ári qarqyndy bola tústi. Ákimshilik memlekettik qyzmet bizde baıqaý negizinde qalyptastyrylady. Memlekettik qyzmetshiniń mansap jolyndaǵy ósýi bizdiń adamdardyń talantymen, jedeldigimen, kásibı daıyndyǵymen tikeleı baılanysty», - dedi Elbasy. N.Nazarbaevtyń sózine qaraǵanda, elimizge saparmen kelgen sheteldik qonaqtar, el Prezıdentteri, úkimet basshylary, saıasatkerler men bıznesmender qazaqstandyq memlekettik qyzmetshilerdiń jas bolǵanymen, jumystarynyń sapasy joǵary ekendigin aıtýda.
