Memlekettik qyzmetshiniń eńbekaqysy jańa júıemen tólenýi múmkin
NUR-SULTAN. QazAqparat – QR Premer mınıstriniń birinshi orynbasary Álıhan Smaılov memlekettik qyzmetshiniń eńbekaqysyn tóleý júıesin masshtabtaý múmkindigi týraly aıtty, dep habarlaıdy QazAqparat.
«Ákimshilik memlekettik qyzmetshiniń pılottyq rejimde eńbekaqysyn tóleýdiń keıbir máseleleri týraly» Úkimet qaýlysyna sáıkes 2018 jyldyń 1 qańtarynan bastap eńbekaqyny tóleýdiń pılottyq rejimde jańa túri engizildi. Aldymen eńbekaqyny jańa júıemen tóleý pılottyq rejim túrinde Memlekettik qyzmet agenttigi men Sybaılas jemqorlyqqa qarsy is-qımyl agenttigi, Ádilet mınıstrligi, Nur-Sultan qalasy jáne Mańǵystaý oblysy ákimdiginde engizildi. 2019 jyldan bastap Almaty jáne Shymkent qalalyq ákimdikterinde, al 2020 jyldan beri Atyraý, Qaraǵandy jáne Pavlodar oblystarynda iske asyp keledi», - dedi Á. Smaılov depýtat saýalynaa bergen jaýabynda.
Onyń aıtýynsha, qazirgi ýaqytta jańa júıeni engizý boıynsha taldaý jasalyp, tıisti Úkimet qaýlysy jobasy ázirlendi. Atalǵan joba ortalyq memlekettik jáne jergilikti atqarýshy organdarmen aldyn ala kelisilgen. Osy oraıda Úkimet QR Konstıtýtsııasy 66-babynyń 9-1 tarmaqshasyna sáıkes, eńbekaqyny tóleýdiń jańa júıesin masshtabtandyrý áreketi boıynsha Memleket basshysynyń kelisimin alý engizildi.
«Memleket basshysy kelisiminiń nátıjesine sáıkes, QR Úkimeti jańa jobany memlekettik jáne jergilikti atqarýshy organdarda engizý boıynsha qaýly shyǵaryp, tıisti sharalar qabyldaıdy», - deıdi Úkimet basshysynyń orynbasary.
