Memlekettik qyzmetshilerge jańa Etıka kodeksiniń jobasy ázirlendi

NUR-SULTAN. QazAqparat – Qazaqstanda memlekettik qyzmetshilerge jańa Etıka kodeksiniń jobasy ázirlendi. Bul týraly QR Memlekettik qyzmet isteri agenttiginiń tóraǵasy Anar Jaıylǵanova aıtyp berdi, dep habarlaıdy QazAqparat tilshisi.

«Etıka talaptaryn qyzmettik etıkaǵa jatpaıtyn ózge de erejelerden bólý maqsatynda memlekettik qyzmetshilerdiń Ádep kodeksin jańa redaktsııada jazý usynylyp otyr. Osyǵan baılanysty, qazirgi ýaqytta ózge elderdiń tájirıbesin eskere otyryp, «Halyq únine qulaq asatyn memleket» tujyrymdamasynda, Prezıdenttiń strategııalyq qujattary men bastamalarynda aıqyndalǵan zamanaýı talaptarǵa sáıkes keletin memlekettik qyzmetshilerdiń jańa Ádep kodeksiniń jobasy ázirlendi», - dedi A. Jaıylǵanova QR Memlekettik qyzmet isteri agenttiginiń alqa otyrysynda.

Spıkerdiń aıtýynsha, kodekste qyzmettik etıkanyń belgili bir standarttarynan bólek, memlekettik qyzmetshilerdiń etıka buzýynyń aldyn alý sharalary praktıkalyq usynystar túrinde qarastyrylǵan.

«Jańa kodeks memlekettik qyzmetshilerdiń etıkalyq mádenıetin qalyptastyrý jumysyn jańa deńgeıge kóteredi dep oılaımyz. Memlekettik basqarý akademııasy bazasynda etıka men quqyqtyń ózekti máselelerin oqytý, múddeler qaqtyǵysyn sheshý boıynsha memlekettik qyzmetshilerdiń biliktiligin arttyrýdyń jańa kýrsyn ázirleý jumystary júrip jatyr», - dep tolyqtyrdy Anar Jaıylǵanova.