Memlekettik qyzmetshilerge qazaq tilin tereńdetip úıretýge arnaǵan «Qazaq tili» atty oqý quraly jaryq kórdi

Bul kitap Qazaqstan Respýblıkasy Mádenıet mınıstrligi Til komıtetiniń tapsyrysy boıynsha shyǵarylǵan, dep habarlaıdy QazAqparat.

Oqý quralynda memlekettik qyzmetshilerge, isker adamdarǵa memlekettik tildi jetik meńgertýge septigi mol mazmundy, baı materıaldar berilgen, túrli leksıka-grammatıkalyq jattyǵýlarmen qamtylǵan. Oqýlyqta tildi meńgerýshiler deńgeıine sáıkes is qaǵazdarynyń túrlerin jazýǵa, til ustartýǵa, aýdarma jasaýǵa daǵdylandyrý arqyly sózdik qoryn baıytýǵa kóp kóńil bólingen.

Eńbek memlekettik qyzmetshiler, memlekettik basqarý fakýltetteriniń stýdentteri, jalpy til úırenýshiler úshin praqtıkalyq turǵydan paıdaly bolary anyq.

Avtordyń aıtýynsha, oqýlyqtyń negizgi maqsaty - Qazaqstan Respýblıkasynyń til saıasatyn júrgizý isinde memlekettik qyzmetshilerge til damytý, burynǵy alǵan bilimderin qazaq tilinde qaıta jańǵyrtyp berý arqyly sózdik qoryn molaıtyp, til ustartý.

Memlekettik organdar arasynda hat-habar almasý, qujat daıyndaı bilý negizin úırený úshin aldymen sol deńgeıge deıingi daıyndyq óte mańyzdy bolyp tabylady.

Osy oqýlyqta úırenýshige tildi mátin arqyly úıretý, onyń mátin boıynsha suraqtarǵa jaýap berip, óz oıyn jetkizý arqyly tilin damytý jaǵy qarastyrylǵan. Berilgen mátinder memlekettik qyzmetshiler úshin qajetti taqyryptardan iriktelip alynǵan.

Sonymen qatar oqýlyqta qujattyń jeńil túrlerin jaza bilýge úıretý, shyǵarma, esse jazý arqyly óz oılaryn jazbasha jetkize bilýge daǵdylandyrý, tyńdaýshylardyń baıandama jasap, sóıleý sheberligin qalyptastyrýǵa baǵyt berilgen.