Memlekettik qyzmetshilerge áleýmettik jelide jeke paraqshasyn júrgizýge bola ma

ALMATY. QazAqparat- Memlekettik qyzmetshilerge áleýmettik jelilerde paraqsha ashýǵa ruqsat etilgen, biraq belgili bir shekteýler bar. Bul týraly brıfıng barysynda QR Memlekettik qyzmet isteri agenttigi Almaty qalasy boıynsha departamentiniń basshysy Ildar Úısimbaev málim etti, dep habarlaıdy QazAqparat tilshisi.

Spıkerdiń sózinshe, memlekettik qyzmetshilerdiń jeke paraqshasyn júrgizýinde birqatar shekteý bar.

«Áleýmettik jelilerdegi paraqshalardyń mazmunyna qatysty azamattardy arandatpaýǵa jáne memlekettik organdarǵa degen senimge nuqsan keltirmeýi tıis tustar bar. Memlekettik qyzmetshilerge qymbat kólikterdiń, sándi ǵımarattardyń, meıramhanalardyń jáne taǵy basqa fonynda oıyn-saýyq oryndarynda túsken fotosýretterin jarııalaýǵa tyıym salynady. Memlekettik qyzmetshi jumystan tys ýaqytta da jalpy qabyldanǵan moraldyq qaǵıdalardy ustanýy kerek», - dep túsindirdi spıker.

Sonymen qatar, ol atalǵan shekteýlerden basqa, Ádep kodeksine sáıkes, memlekettik qyzmetshiler memlekettik qyzmettiń bedelin túsiretin aqparatty, tyıym salynǵan zattardy qoldaný arqyly ádepsiz minez-qulyqty kórsetetin fotosýretterdi jarııalamaýy jáne naqty dinı ustanymdaryn kórsetpeýi tıis ekenin eskertti.