Memlekettik qyzmetshilerdiń jumysyn baqylaý birneshe baǵytta júrgiziledi
Sybaılas jemqorlyqqa qarsy departament dırektory Salaýat Mýksımovtiń aıtýynsha, qoǵamdyq baqylaý kartasy áleýmettik jeliler men baılanys ortalyǵynyń jumysyna negizdeletin bolady. «Qazirdiń ózinde agenttikke qarasty árbir aımaqtyq qurylym áleýmettik jelilerde óz paraqshalaryn júrgizip keledi. Ol - bir. Ekinshiden, qoǵamdyq baqylaý «Qamqor» atty mobıldi qosymsha arqyly júrgiziledi. Úshinshiden, aımaqtarda arnaıy baqylaý toptary bolady. Olar da memlekettik qyzmetshilerdiń jumysyn qadaǵalaıdy», - dedi S.Mýksımov Astanada ótken baspasóz máslıxatynda.
Departament basshysy áleýmettik jelilerdiń tıimdiligin erekshe atap ótti. Máselen, agenttik basshysy Alık Shpekbaev óziniń jeke paraqshasyn ashqannan beri oǵan 160 aryz tústi. Jalpy, ótken jylmen salystyrǵanda xalyq tarapynan túsetin aryz-shaǵymdardyń kólemi eki esege artyp otyr.
«Áleýmettik jeliler arqyly biz buǵan deıin bilmeı kelgen tártip buzýshylyqtardy ashyp, sybaılas jemqorlyq áreketterin azaıta alamyz. Máselen, qazirgi kezde kez kelgen aımaqtyń turǵyny Feısbýk, VKontakte, Instragram, sondaı-aq Ýatsap pen Telegramm messendjerleri arqyly óz aryzdaryn jibere alady. «Qamqor» mobıldi qosymshasyn da paıdalanyp, tártip buzýdyń fotosyn joldaýǵa múmkindik bar», - dep atap kórsetti S.Mýksımov.