Memlekettik qyzmetshilerdiń minez-qulqyna qatysty saýalnama nátıjesi jarııalandy

NUR-SULTAN. QazAqparat – Qazaqstandaǵy Birikken Ulttar Uıymynyń Damý baǵdarlamasy (BUUDB) jáne QR Memlekettik qyzmet isteri agenttigi memlekettik qyzmetshilerdiń ádep deńgeıin baǵalaý jónindegi áleýmettik zertteýdiń nátıjelerin usyndy, dep habarlaıdy QazAqparat.

Áleýmettik zertteýdi «Qoǵamdyq pikir» zertteý ınstıtýty 2020 jyly ótkizgen.

Saýalnamaǵa barlyǵy 7 myń respondent, onyń ishinde memlekettik qyzmetshiler, kásipkerler, zańdy tulǵalar, sondaı-aq táýelsiz sarapshylar qatysty.

Saýalnama nátıjesi boıynsha:

- respondentterdiń úshten biri (37,5 paıyzy) memlekettik qyzmetshilerdiń jartysynan kóbi Ádep kodeksin saqtaıdy dep sanaıdy;

- 34,9% memlekettik qyzmetshilerdiń minez-qulyq ádebine qatysty jaǵdaı jaqsaryp keledi degen pikirde;

- 31% jaǵdaı árdaıym jaqsy degen senimde.

Sondaı-aq málim bolǵandaı, respondentterdiń basym kópshiligi nemquraılylyq, nazar aýdarmaý, kómek kórsetýden bas tartý, dórekilik, mańyzdy aqparatty jasyrý, jeke bas múddesine oraı áreket etý syndy memlekettik qyzmetshiniń ádepke jat minez-qulqyna qatysty shara qoldanbaǵan.

«2020 jyldyń nátıjelerin 2017, 2018 jyldardaǵy nátıjelermen salystyrsaq, aıtarlyqtaı ózgeristerdi kórýge bolady.

ıAǵnı memlekettik qyzmetshilerge qatysty ádepke saı emes minez-qulqyna baılanysty sharalar qabyldaýǵa májbúr bolǵan respondentterdiń paıyzy aıtarlyqtaı tómendedi. Mysaly, eger 2018 jyly 34,7% respondent memlekettik qyzmetshiniń ádepke jat minez-qulqyna qatysty sharalar qabyldaýǵa týra keldi dep jaýap berse, 2020 jyly mundaı respondentter úlesi 13,4% boldy», - dedi Memlekettik qyzmet isteri agenttiginen.

Sonymen qatar, respondentterdiń basym kópshiligi (92,8%) karantın kezinde memlekettik qyzmetshilermen áreketke túsý barysynda ádepke qatysty qandaı da bir problemalardy baıqamaǵan. Tek 10 adam (0,4%) karantın kezinde ádepke baılanysty buzýshylyqtardy baıqaǵanyn aıtty.

«Budan basqa, 2021 jyly agenttik alǵash ret Ádep jónindegi ýákilge ádeptilik deńgeıin aıqyndaý úshin árbir memlekettik organnyń resmı saıttarynda saýalnama ornalastyrýdy usyndy. Oǵan barlyq azamattar qatysa alady. Memlekettik qyzmetshilerdiń ádep deńgeıiniń jáne Ádep jónindegi ýákilder qyzmetiniń reıtıngileri myna silteme boıynsha qoljetimdi», - dedi vedomstvodan.

Saýalnama BUUDB men Memlekettik qyzmet isteri agenttiginiń «memlekettik apparatty kásibılendirý tetikterin jetildirý, memlekettik qyzmetterdiń sapasyn qamtamasyz etý jáne sybaılas jemqorlyqtyń aldyn alý» birlesken jobasy sheńberinde júrgizildi.