«Memlekettik qyzmetshilerdiń qyzmet tizimi úlgisin bekitý týraly» buıryqqa ózgerister engizildi
ASTANA. 12 qyrkúıek. QazAqparat. 2011 jyldyń 10 qyrkúıeginde «Egemen Qazaqstan» jáne «Kazahstanskaıa pravda» gazetterinde «Qazaqstan Respýblıkasy Memlekettik qyzmet isteri agenttigi Tóraǵasynyń «Memlekettik qyzmetshilerdiń qyzmet tizimi úlgisin bekitý týraly» 2003 jylǵy 29 sáýirdegi №02-01-02/59 buıryǵyna ózgeris engizý týraly» Qazaqstan Respýblıkasy Memlekettik qyzmet isteri agenttigi Tóraǵasynyń buıryǵy jarııalandy.
Buıryqtyń túsindirmesine sáıkes, azamattardyń óz qabiletteri men kásibı daıarlyǵyna sáıkes memlekettik qyzmet boıynsha joǵarylaý quqyǵy memlekettik qyzmettiń mańyzdy prıntsıpteriniń biri bolyp tabylatyn jalpy qol jetimdilik prıntsıpine negizdeledi. Bul prıntsıp Qazaqstan Respýblıkasynyń «Memlekettik qyzmet týraly» zańynda bekitilgen.
Zańnyń 8-babynda memlekettik qyzmetshiniń biliktiligi men qabileti, óziniń qyzmettik mindetterin adal oryndaýy eskerile otyryp, qyzmeti boıynsha joǵarylatylýǵa quqyǵy bekitilgen.
Qazirgi kezde bos memlekettik ákimshilik laýazymdarǵa barlyq taǵaıyndaýlardyń 70%-na deıinaýysý tártibimen júzege asyrylady. Bul shamamen jylyna 22 000 taǵaıyndaýdy quraıdy.
Zańnamaǵa sáıkes, mundaı jaǵdaıda memlekettik qyzmetshi bos laýazymǵa qoıylatyn biliktilik talaptaryna saı bolýy tıis. Sonymen qatar, memlekettik qyzmetshiniń ózine qoıylatyn negizgi talaptar ekeý-aq: jumys ótili men bilimi boıynsha talaptar.
Osylaısha, eger memlekettik qyzmetshiniń jetkilikti jumys ótili men tıisti dıplomy bolsa, onda ol tıisti laýazymǵa aýysý tártibimen taǵaıyndala alady. Bul rette, onyń burynǵy laýazymdaǵy jumys nátıjeleri, onyń qyzmettik mindetterin oryndaýyna berilgen baǵa, kásibı jáne jeke qasıetteri, basqa da naqty qabiletteri, sondaı - aq kásibı daıyndyǵynyń kórsetkishteri eskerilmeıdi.
Shyn máninde, memlekettik qyzmetshini konkýrssyz aýysý tártibimen taǵaıyndaǵan jaǵdaıda, onyń joǵaryda atalǵan qasıetterin baǵalaýdy burynǵy jumys ornynyń berýin qamtamasyz etetin tolyqqandy tetik joq. Memlekettik organ óziniń qyzmetkerin qabyldaý týraly sheshim qabyldaǵaly jatqan memlekettik organǵa aýysyp jatqan qyzmetshisiniń joǵaryda atalǵan kórsetkishteri týraly baǵany berýi mindetti emes.
Osyǵan baılanysty Agenttiktiń osy buıryǵy zańnama boıynsha árbir memlekettik qyzmetshige toltyrylatyn jáne bos laýazymdyq orny bar memlekettik organ memlekettik qyzmetshini aýysý tártibimen taǵaıyndaýdy kelisý úshin Agenttikke usynatyn qujatqa - qyzmet tizimine ózgerister engizýdi kózdeıdi.
Agenttiktiń buıryǵyna sáıkes qyzmet tizimine «Memlekettik qyzmetshige minezdeme» atty jańa bólim engizildi. Minezdeme birneshe kórsetkishter boıynsha toltyrylady, olar: kóshbasshylyq qasıetteri jáne jumysty uıymdastyrý qabileti(basshylyq laýazymdaǵy adamdar úshin), jaýapkershiligi men oryndaýshylyǵy jáne taǵy basqalary. Olardyń árqaısysy 4 balldyq shkala boıynsha baǵalanady.
Sonymen qatar buıryqpen qyzmet tiziminiń qoldanystaǵy bólimderine de ózgerister engizildi. Jańa baǵandar kózdelgen: «Qaıta daıarlaý kýrstaryn, biliktilikti arttyrý semınarlaryn ótý kúni», «Sybaılas jemqorlyq quqyq buzýshylyǵyn jasaǵany úshin ákimshilik jazany qoldaný týraly málimetter...».
Qyzmet tizimi aýysý tártibimen taǵaıyndalýǵa kandıdatýrany qarastyryp jatqan memlekettik organǵa úmitkerdiń burynǵy jumys orny bergen onyń qabiletteri men kásibı daıyndyǵy jónindegi resmı baǵany alýyna múmkindik beredi. Bul óz kezeginde memlekettik qyzmetshini aýystyrý týraly sheshim qabyldaıtyn burynǵy jumys ornyndaǵy da, jańa jumys ornyndaǵy da laýazymdy adamdardyń jaýapkershilik deńgeıin arttyrýǵa yqpal etetin bolady.
Osy buıryq QR Prezıdentiniń 2011 jylǵy 21 shildedegi Jarlyǵymen bekitilgen «Qazaqstan Respýblıkasy memlekettik qyzmeti jańa modeliniń tujyrymdamasyna» sáıkes memlekettik qyzmet salasyndaǵy kadr saıasatyn jetildirý boıynsha Agenttik júrgizip jatqan jumystyń aıasynda qabyldandy.
Buıryq jáne onyń túsindirmesi týraly tolyq aqparat QR Memlekettik qyzmet isteri agenttiginiń www.kyzmet.kz resmı veb-saıtynda ornalasqan.
