Memlekettik qyzmetshilerdiń Qytaıǵa issaparmen barýyna shekteý qoıyldy
Bul týraly Qazaqstannyń bas sanıtar dárigeri Jandarbek Bekshın aıtyp berdi.
«Úkimet QHR aýmaǵyna týrıstik saparlarǵa shekteý qoıdy. Sonymen birge, memlekettik qyzmetshilerdiń issaparlaryn shekteý týraly qaýly shyǵaryldy. Barlyq halyqaralyq sporttyq sharalar, sonyń ishinde halyqaralyq tennıs týrnıri ótpeıtin boldy. QHR aýmaǵyna temirjol jolaýshylar tasymaly toqtatyldy», - dedi J. Bekshın Ortalyq kommýnıkatsııalar qyzmetinde ótken brıfıngte.
Sonymen birge, bas sanıtar dáriger Dúnıejúzilik densaýlyq saqtaý uıymynyń koronavırýske qatysty ustanymyn jarııalady. Onyń aıtýynsha, DDSU Qytaıdyń epıdemııanyń aldyn alýǵa qabiletti ekenine senimdi.
«Halyqaralyq uıym álem elderine Qytaıdan óz azamattaryn evakýatsııalaýǵa keńes bermeıdi. Olar halyqaralyq qaýymdastyqty sabyrly bolýǵa, oqıǵaǵa shamadan tys reaktsııa kórsetpeýge shaqyrady», - dedi J. Bekshın.
