Memlekettik qyzmetshilerdiń kásibı deńgeıin damytýǵa arnalǵan qujat ázirlenip jatyr

ASTANA. QazAqparat – Memlekettik qyzmetshilerdiń kásibı deńgeıin jetildirýge arnalǵan ustanymdar ázirlenip jatyr. Bul týraly Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi.

«Memlekettik mindetterdi qoǵamnyń talap-tilekterine saı júzege asyrý úshin negizgi qundylyqtar men basymdyq beriletin qaǵıdattardy qaıta qaraý – ózekti. Memlekettik qyzmettegi adam resýrsyn ilgeriletý memlekettik qyzmetshilerdiń kásibı-tulǵalyq bolmysyn jetildirýmen de tyǵyz baılanysty», – dedi Darhan Jazyqbaev elordada ótip jatqan «Memlekettik qyzmettegi HR: personaldy strategııalyq basqarýǵa kóshý» forýmynda.

Osy oraıda ol agenttik memlekettik qyzmetshilerdiń kásibı jáne tulǵalyq bolmysy jaıly, sondaı-aq sanany jańǵyrtýǵa baǵyttalǵan qujat daıarlap, ony tanystyrýdy josparlap otyrǵanyn aıtty. Bul rette, memlekettik qyzmetshilerdiń kásibı-tulǵalyq bolmysyn jetildirýge qatysty qaǵıdattar men ustanymdar júıelenip jatyr.

Onyń paıymynsha, bul qujat memlekettik qyzmetshilerde ádistemelik qural retinde bolýy tıis. Onda qoǵamǵa úlgi kórsetý, ulttyq múddeni oılap, memleketshil bolý, ádildiktiń barshaǵa ortaq ıgilik bolýy, pikir alýandylyǵyn qoldaý, antqa adaldyq syndy negizgi qaǵıdattar belgilenýi josparlanǵan.

«Bul qujatty biz aldaǵy ýaqytta qoǵammen talqylaýǵa salatyn bolamyz. Memlekettik basqarýdy jetildirý júıeli túrde ózgerýdi, qaıta qurýdy qajet etedi. Adamdardyń oı-sanasyn jańǵyrtý adam resýrstarynyń sapasyna áser etedi. Usynylatyn qujat memlekettik qyzmetshilerdiń sanaly, rýhanı-adamgershilik turǵydan ózgerýin yntalandyrýǵa baǵyttalǵan jáne olardyń memlekettik basqarý júıesindegi qyzmetin sapaly túrde júrgizýge arnalǵan. Eń bastysy – el aldyndaǵy jaýapkershilikti seziný», – Darhan Jazyqbaev.

Budan buryn habarlanǵandaı, memlekettik qyzmetke ornalasýda konkýrstyq rásimdi ótkizý formaty qaıta qaraldy.