Memlekettik qyzmetshilerdiń issapar esebin tapsyrýy jeńildedi
Budan bylaı, issaparǵa shyqqan memlekettik qyzmetshilerge jol júrý bıletterin tapsyrý ǵana jetkilikti.
«Agenttiktiń bastamasymen 2018 jyldyń 29 jeltoqsanynda Úkimet qoldanystaǵy Qyzmettik issaparlarǵa arnalǵan shyǵystardy óteý qaǵıdalaryna ózgerister engizdi. Atap aıtsaq, memlekettik organdar ózderiniń qyzmet ereksheligin eskere otyryp, qyzmettik issaparlarǵa jiberýdiń ishki tártibin derbes ázirleý men bekitý quqyǵyna ıe boldy. Memlekettik qyzmetshilerden ýaqytsha turǵan jeri úshin qajetti qujattardy ótkizý talaby joıyldy», - dedi Sybaılas jemqorlyqqa qarsy saıasat departamentiniń dırektory Danııar Sabyrbaev Astanada ótken baspasóz máslıhatynda.
Іssapardaǵy qyzmetkerlerden fıskaldyq chekter, kassalyq kiris orderleri, shot-faktýralar, esepter, habarlandyrýlar, jaldaý sharty, patentter, kýálikter jáne ózge de qonaqúı qyzmetin rastaıtyn qujattardy tapsyrý mindeti alynyp tastaldy.
«Osylaısha, jalǵan qujattardy ázirleıtin tutas naryqty joıyp otyrmyz. ıAǵnı, qonaq úıdi jaldaý týraly jalǵan qujat ótkizýdiń endi qajeti joq. Sońǵy úsh jylda issaparlyq shyǵynǵa bólingen bıýdjet qarajatyn negizsiz jumsaý faktisi boıynsha 84 qylmystyq is tirkelgen. Olardyń birazy issapar esebin ótkizýdegi artyq qaǵazbastylyqtan jáne paıda kórý maqsatynda zańbuzýshylyqqa barǵan. Jalǵan qujat jasatýǵa májbúr bolǵan», - dedi Danııar Sabyrbaev.
Onyń aıtýynsha, EYDU elderinde issaparlyq esep berý barynsha jeńildetilgen. Onda ár qala úshin bólinetin qarajat normatıvpen bekitilgen jáne kólik bıletin tapsyrý jetkilikti.
«Táýliktik jáne turatyn mekendi jaldaý boıynsha issapar shyǵyndaryn óteý kólemi ózgerissiz qaldy. Ol aılyq eseptik kórsetkish boıynsha bekitilgen normatıvterge sáıkes anyqtalady. Astana, Almaty, Shymkent, Aqtaý syndy iri qalalar úshin 7 AEK (2019 jyldaǵy 1 AEK - 2525 teńge) tólenedi. Ózge qalalar úshin - 6 AEK jáne tamaqtaný úshin - 2 AEK beriledi», - dedi D. Sabyrbaev.
Sonyme birge, issapar shyǵyndaryn óteýdi ońtaılandyrý arqyly býhgalterlik qyzmettiń jumysy jeńildeıdi jáne olardy qysqartýǵa bolady.
«Agenttik 2019 jyldan bastap, ortalyqtandyrylǵan eńbekaqy, eńbek demalysy, issapar shyǵyndary jáne býhgalterlik esep júrgizýdi bastady. Bıyl 1 naýryzdan bastap, agenttiktiń aýmaqtyq bólimshelerinde býhgalter laýazymyn qysqartý josparlanǵan. Qysqartýdan shamamen 28 mln teńge únemdeledi. Bul qarajat qyzmetkerlerdiń eńbekaqysyn arttyrýǵa jumsalady», - dedi brıfıngte MQІSJQA Іshki aýdıt basqarmasynyń basshysy Sáýle Aqmambaeva.