Memlekettik qyzmetshilerdiń aılyǵy ne úshin kóterildi
«Memlekettik qyzmettiń básekege qabiletsiz jumys berýshige aınalǵany sonsha, kóptegen sarapshy deńgeıindegi qujat ázirleı alatyn mamandar «ıAndeks taksı» sııaqty qyzmet kórsetý salasynda kóbirek tabys taba bastady. Birinshi kezekte biz óńirlerdegi memlekettik qyzmetshilerdiń aılyǵyn kóterdik. Óıtkeni, ásirese, jergilikti ákimdikterde biliktilik máselesi ózekti boldy», - degen Dáýren Abaev aılyq kóterilgennen beri qyzmetker irikteý konkýrstarynda báseke paıda bolǵanyn atady.
«Buryn qalaı edi? Ákimdik sarapshy laýazymyna konkýrs jarııalady deıik. Bir adam ǵana ótinim beretin. Sebebi aılyǵy óte az boldy. Senińiz, mundaı jaǵdaıda onyń quzyrettiligin eshkim teksermeıdi de. Jumys isteýge kelisse boldy deıdi. Al aılyqty kóterip edi, konkýrsqa túsetin ótinimderdiń sany 7 ese ósti-aý deımin. Konkýrs qanshalyqty básekeli bolsa, irikteletin mamannyń sapasy da sonshalyqty joǵary bolady. ıAǵnı, irikteýge múmkindik bar. Árıne, mundaı irikteýden ótip alynǵan mamannyń qateligi de áldeqaıda az bolady. Sonyń arqasynda halyqtyń ómir sapasyna tıgizer paıdasy da kóbirek bolady», - dedi «Ashyq dıalog» suhbatynyń turaqty qonaǵy.
Aıtýynsha, memlekettik qyzmetshiniń aılyǵy moınyna arqalaıtyn jaýapkershigine saı kóterilgen.
«Taǵy bir másele jaýapkershilik deńgeıine kelip tireledi. Elestetip kórińiz, bir mınıstrliktegi nemese ákimdiktegi qandaı da bir basqarmanyń basshysy júzdegen mıllıon teńgeniń qujatyna qol qoıady. Tekserýshi organdar sol qujattan tipti jalǵyz formaldy qate tapsa, sol úshin arqalaıtyn jaýapkershiliktiń qunyna buǵan deıin alyp kelgen 150 myń teńge aılyǵy tatı ma? Al tutas bir salanyń nemese óńirlerdiń damýyna jaýapty mınıstrler men ákimderdiń jaýapkershiligi týraly aıtýdyń ózi artyq», - dedi Dáýren Abaev.
