Memlekettik qyzmetshilerdi testileýdiń nátıjelerin qatań eseptegi blankilerde berý engizilýde
ASTANA. 2 tamyz. QazAqparat - 1 tamyzdan bastap QR Memlekettik qyzmet isteri agenttiginiń tóraǵasy Álıhan Báımenovtyń «QR Memlekettik qyzmet isteri agenttigi jáne onyń aýmaqtyq bólimshelerinde testileý protsedýrasyn uıymdastyrýdyń keıbir máseleleri týraly» buıryǵy kúshine endi.
Buıryqqa sáıkes, Agenttiktiń jáne onyń aýmaqtyq bólimshelerinde júrgiziletin testileý nátıjelerin qatań eseptegi blankilerde berý josparlanyp otyr.
Vedomstvonyń baspasóz qyzmetiniń habarlaýynsha, osyǵan baılanysty «Memlekettik qyzmettiń personalyn basqarý ulttyq ortalyǵy» AQ jáne agenttiktiń Memlekettik qyzmetti kadrlyq qamtamasyz etý departamentine qatań eseptegi blankilerdi qoldanysqa engizý jáne testileý boıynsha baǵdarlamamen qamtamasyz etýine ózgerister engizý máselelerin pysyqtaý tapsyryldy.
Ortalyqtandyrylǵan tártip boıynsha baspahanalyq tásilmen jasalǵan qatań eseptegi blankiler engizilgenge deıin qatań eseptegi ýaqytsha blankiler engiziledi. Testileýdiń nátıjeleri blanktiń serııa men nómiri kórsetilip testileý nátıjelerin esepteý jýrnalyna tirkeledi. Qatań eseptegi blankterdi esepke alý jáne atalǵan jýrnaldy júrgizý agenttiktiń jáne onyń aýmaqtyq bólimsheleriniń testileý ákimshilerine júkteldi.
Agenttik tóraǵasynyń tapsyrmasymen vedomstvonyń Іshki baqylaý qyzmeti júrgizgen tekseristiń barysynda osy kezge deıin memlekettik qyzmetshilerdi testileý nátıjeleri jaı aq qaǵazda shyǵarylyp beriletini, sonymen qatar, agenttiktiń keıbir aýmaqtyq bólimshelerinde testileý nátıjelerin esepke alý jumysy jetkilikti júrgizilmegeni anyqtaldy. Bul sybaılas jemqorlyqqa qatysty quqyq buzýshylyqqa jaǵdaı týǵyzady.
Atalǵan buıryq testileý protsedýrasyn uıymdastyrýdy ári qaraı jetildirý maqsatynda shyǵaryldy. Elbasymen bekitilgen QR memlekettik qyzmeti jańa modeliniń tujyrymdamasy aıasynda osy baǵytta keshendi is-sharalardy júzege asyrý josparlanyp otyr.
