Memlekettik qyzmetshilerdi irikteý eki kezeńnen turatyn konkýrs negizinde júzege asatyn bolady

Búgin QR Memlekettik qyzmet isteri agenttiginde memlekettik qyzmet jańa modeliniń tujyrymdamasyna arnalǵan jıyn barysynda agenttik tóraǵasy Álıhan Báımenov osylaı málim etti.

Atap aıtqanda, zańnama normalaryna, ákimshilik standarttary men reglamentterine, basqarýshylyq korpýsynyń talaptaryna sáıkes iske asyrý qyzmetin júzege asyratyn memlekettik qyzmetshilerdi irikteý eki kezeń boıynsha, konkýrs negizinde júzege asyrylatyn bolady. Birinshi kezeńde Agenttik belgili bir merzimdilikpen (mysaly aıyna bir ret) zańnamany bilý jónindegi testileýdiń negizinde jáne kásibı jáne jeke quzyretteri boıynsha kadr rezervine jınaqtaýdy júrgizetin bolady. Bul rette qajet bolsa, áńgimelesý, esse jazý da qarastyrylady. Al ekinshi kezeńde memlekettik organ rezervter qatarynan ǵana bos laýazymǵa konkýrs ótkizedi. «Konkýrstyq irikteýdiń ashyqtyǵy men shynaıylyǵynyń asa joǵary deńgeıin qamtamasyz etýge baǵyttalǵan birqatar sharalar júzege asady. Atap aıtqanda, memlekettik organdardyń konkýrstyq komıssııalarynyń quramyna syrtqy sarapshylardy qosý, konkýrstyq komıssııa músheleriniń jaýapkershiligin belgileý, áńgimelesý rásiminiń ashyqtyǵyn qamtamasyz etý sharalar kózdeledi. Bundaı úderisterge BAQ ókilderi shaqyrylyp, aýdıo-beıne baqylaý jumystary da qarastyrylatyn bolady», - deıdi Á. Báımenov.