Memlekettik qyzmetshiler juma kúni erkin kıimmen jumysqa kelýi múmkin

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginde dress-kodsyz juma tájirıbesi pılottyq rejımde engizildi, dep habarlaıdy QazAqparat tilshisi.

«Bıyl agenttikte Casual Friday, ıaǵnı dress-kodsyz juma tájirıbesi bastalady. Korporatıvtik sektorda bul bastama jaqsy qabyldanady, keı óńirlerde birneshe másele týyndady, olardy sheshemiz degen úmittemin. Bul da memlekettik qyzmetti jeńildetý, qarapaıym ári senimdi qarym-qatynas qurý jáne mamannyń áleýetin ashý úshin mańyzdy», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev agenttik alqasynyń keńeıtilgen otyrysynda.

Agenttik basshysy otyrysta memlekettik qyzmetshilerdiń jumys pen jeke ómir teńgerimi týraly taǵy bir mańyzdy máseleni kóterdi.

«Memlekettik qyzmetshiler 18:30-da jumys kúnin aıaqtap, bos ýaqytyn otbasy men tulǵalyq damýyna arnaýy tıis. Bul týraly Memleket basshysy birneshe ret aıtty. Sport pen ózge de qyzyqty sharalar zııandy ádetterden, bos saýyq pen alkogol tutynýdan aýlaq bolýǵa yqpal etedi», - dedi A. Shpekbaev.