Memlekettik qyzmetshiler Úrjardaǵy balalar úıiniń tárbıelenýshilerin quttyqtady
ÚRJAR. QazAqparat - Búgin Shyǵys Qazaqstan oblysy Úrjar aýdanynyń barlyq mekemeleri men kásipkerleri Naýaly balalar úıiniń tárbıelenýshilerin halyqaralyq balalardy qorǵaý kúnimen quttyqtap, syılyqtaryn tabys etti, dep habarlaıdy QazAqparat tilshisi.
Dál osy kúni lagerdiń ashylý saltanaty ótti. Aıta keteıik, balalar úıiniń tárbıelenýshileri jazǵy demalystaryn «Tarbaǵataı» saýyqtyrý saıajaıynda ótkizedi.
Saltanatty shara barysynda aýdan ákiminiń apparat basshysy Naımanǵazy Qaratalov Úrjar aýdanynyń basshysy Serik Zaınýldınniń atynan merekemen quttyqtap, syılyqtaryn tabystady. Sonymen birge aýdandyq bilim bóliminiń basshysy Sáýle Júnisova, №2086 áskerı bólimi, mádenıet úıiniń dırektory Maıra Kebispaeva jáne aýdandyq jáne oblystyq máslıhat depýtattary jyly lebizderin bildirdi.
Naýaly balalar úıiniń oqý tárbıe isiniń meńgerýshisi Gúlnár Zýlharnaıqyzy kelgen qonaqtarǵa ujym atynan alǵys aıtty. Odan ári «Biz Qazaqstan balalarymyz! Biz jańa álemde ómir súremiz!» atty kontsertke ulasty. Atalmysh shara barysynda ónerge degen yntasy mol jasóspirimder qonaqtardyń aldynda ónerlerin pash etti.
Sońynan 2086 áskerı bóliminiń sarbazdary balalardy meıramdarymen quttyqtap, shaǵyn kontsertterin usyndy.
«Naýaly balalar úıinde búgingi kúni 54 bala tárbıelenip otyr. Balalardyń barlyǵy memlekettik turǵyn úı qoryna kezekke tirkelgen jáne jeke esepshottary bar. Memleketten tıisti járdemaqylar osyǵan aýdarylyp, ony mekeme baqylap otyrady. Balalardyń barlyǵynyń áleýmettik statýsy tolyq anyqtalyp, respýblıkalyq bank júıesinde tirkelgen. Árbiriniń jyljymaıtyn múligi ýaqytynda zańdy túrde qamqorlyqqa alynyp otyr. Osy oqý jylynda bes bala januıaǵa ornalasty», - deıdi Naýaly balalar úıiniń dırektory Tursyn Dombalanov.
Aıta keterligi, olardyń bilimdegi, ónerdegi, sporttaǵy jetistikteri jeterlik.
