Memlekettik qyzmetshiler Prezıdent júktegen mindetti biraýyzdan qoldaıdy – Dáýren Abaev

NUR-SULTAN. QazAqparat – Qazaqstandyq memlekettik qyzmetshiler Prezıdenttiń tapsyrmasyn bir kisideı qoldaıdy. Bul pikirdi QR Prezıdenti Ákimshiligi Basshysynyń birinshi orynbasary Dáýren Abaev alǵa tartty, dep habarlaıdy QazAqparat tilshisi.

«Habar» telearnasynda ótken «Ashyq dıalog» 2.0 (Otkrytyı dıalog 2.0) telebaǵdarlamasynyń kezekti qonaǵy QR Prezıdent ákimshiligi basshysynyń birinshi orynbasary Dáýren Abaev boldy.

Telejúrgizýshiniń kezekti suraǵy memlekettik qyzmetkerlerge qatysty boldy «Memleket basshysynyń tapsyrmasyn oryndaýda keıbir memlekettik qyzmetkerlerdiń isti ádeıi aqsatýy múmkin be?» - degen saýal qoıyldy.

«Memlekettik sheshimderdiń iske asý barysyn tereń túsinbeıtinder bar. Kez kelgen sheshim birneshe satydan ótip baryp qabyldanady. Ol degenimiz josparlaý, júzege asyrý mehanızmin jasaý, qarjylandyrý, memlekettik organdarmen kelisimge kelý taǵy sol sııaqty. Iá, Memleket basshysy bılikke óte joǵary qarqynmen tapsyrma júktep jatyr. Tipti keıbir tapsyrmalardy oryndaýda qarqyndy jumys isteý múmkin bolmaı jatady. Biraq, sol mindetter qasaqana oryndalmaı jatyr degen túsinik joq, men oǵan senimdimin. Olaı bolǵan jaǵdaıda másele basqasha qaralady. Prezıdenttiń Joldaýynda ne aıtylǵany esińizde me? Kim júktelgen mindetti oryndaýdan bas tartsa nemese qashqaqtasa, onda ornyn bosatsyn delingen. Sóz sońynda memlekettik apparattyń qyzmetkeri retinde jáne ondaǵy protsesti ishki jaǵynan biletin adam retinde aıtarym, tómengi satydan joǵary satyǵa deıingi barlyq memlekettik qyzmetkerler Prezıdent júktegen mindetti biraýyzdan qoldaıdy», - dep jaýap berdi Dáýren Abaev.

Suhbat barysynda Dáýren Abaev Qazaqstanda sybaılas jemqorlyqpen kúresýdiń búgingi jaǵdaıy týraly aıtyp berdi.

Sondaı-aq, Prezıdent ákimshiligi basshysynyń birinshi orynbasary elimizdegi monoqalalardyń taǵdyryna alańdaýshylyq tanytty.

Odan bólek, telebaǵdarlama qonaǵy qazaqstandyqtarǵa qaıta vaktsına egý protsesiniń basty qaǵıdattaryn jiktep kórsetti.