Memlekettik qyzmetshiler qaı ýaqyttan bastap jumysqa smartfonmen kire alady

ASTANA. QazAqparat - QR Aqparat jáne kommýnıkatsııalar mınıstri Dáýren Abaev memlekettik qyzmette smartfon ustaýǵa qatysty pikir bildirdi, dep xabarlaıdy QazAqparat tilshisi.

«Biz memlekettik qyzmette smartfon ustaýdyń jolyn taptyq. Sonyń arqasynda memlekettik qyzmetshiler jumysqa smartfonmen kire alady. Osyǵan baılanysty arnaıy pılottyq jobany ótkizdik. Bári sátti bolǵan sııaqty. Bıyl osy máseleni sheshetin shyǵarmyz», - dedi D.Abaev jýrnalısterge bergen suxbatynda.

Mınıstrdiń aıtýynsha, pılottyq joba QR Aqparat jáne kommýnıkatsııalar mınıstrliginde qolǵa alyndy. Sonyń aıasynda on shaqty qyzmetker jumysqa smartfonmen kirip júr.

«Endi bul máseleniń protsedýralary kóp. Qazir testileý rejımi ótti. Bálkim, aldaǵy ýaqytta mınıstrliktiń qyzmetkerlerin tolyǵymen qamtıtyn shyǵarmyz. Osydan keıin barlyq memlekettik qyzmetkerlerge jumysta smartfon ustaýǵa ruqsat berýge bolady», - dep atap kórsetti D.Abaev.

Aıta keteıik, búgin Ortalyq kommýnıkatsııalar qyzmetinde QR Aqparat jáne kommýnıkatsııalar mınıstrliginiń alqa májilisi ótti. Sol jerde Dáýren Abaev tsıfrlyq telexabarlarǵa qosylatyn oblystardy atady. Spýtnıktik qabyldaǵyshtar aýyl turǵyndaryna tegin beriledi. Al Qazaqstannyń telexabarlary Reseıge tarala bastady. Al QR Premer-Mınıstriniń orynbasary - QR Qorǵanys jáne aeroǵarysh ónerkásibi mınıstri Asqar Jumaǵalıev aqparattyq texnologııalardy damytý boıynsha birqatar tapsyrmalar berdi. Sondaı-aq, ol anyqtamalardy barynsha qysqartýdy tapsyrdy.