Memlekettik qyzmetshiler qatary jańa tolqynmen tolyqty
ASTANA. 27 maýsym. QazAqparat - Búgin Astanada Qazaqstan Respýblıkasy Prezıdentiniń janyndaǵy Memlekettik basqarý akademııasynda Memlekettik saıasattyń ulttyq mektebi (MSUM) men Sot Tóreligi ınstıtýtynyń túlekterine dıplom tapsyrý saltanatty rásimi ótti.
Sharaǵa QR Prezıdenti Ákimshiligi Basshysynyń orynbasary Baýyrjan Baıbek, QR Memlekettik qyzmet isteri agenttiginiń tóraǵasy Álıhan Báımenov, QR Joǵarǵy Sotynyń qylmystyq ister jónindegi qadaǵalaý alqasynyń tóraǵasy Aqyltaı Qasymov, QR Prezıdentiniń janyndaǵy Memlekettik basqarý akademııasynyń rektory Bolatbek Ábdirasylov, sondaı-aq Dıýk ýnıversıteti Senford memlekettik saıasat mektebiniń (AQSh) ókilderi qatysty.
Akademııa rektory B. Ábdiraslovtyń aıtýynsha, bul eki joǵary oqý orny elimizdegi aldyńǵy qatarly memlekettik qyzmetkerlerdi daıarlaýda úlken ról atqarady.
MSUM-nyń mindeti - memlekettik saıasat pen memlekettik basqarý salasynda halyqaralyq talaptarǵa saı memlekettik qyzmetkerlerdiń jańa býynyn daıyndaý. Bıyl 16 túlek osy mektepten túlep ushyp otyr. Olardyń barlyǵy MSUM-nyń jáne Dıýk ýnıversıtetiniń eki dıplomyn alyp shyǵady.
Kýrstardy áriptes joǵary oqý orny Dıýk ýnıversıtetiniń Senford memlekettik saıasat ulttyq mektebiniń professorlary, QR mınıstrlikteri men vedomstvolarynyń birinshi basshylary, Parlament depýtattary jáne shetel elshileri júrgizedi.
Akademııanyń Sot tóreligi ınstıtýtyn 69 adam támamdady, onda mamandandyrylǵan magıstratýrada sot korpýsyna kadr rezervin daıarlaıdy.
