Memlekettik qyzmetshiler baǵytyndaǵy rotatsııa máselesi asa qajetti úderis - B. Báıbek
ASTANA. 14 maýsym. QazAqparat /Qanat Mámetqazyuly/ - Memlekettik qyzmetshiler baǵytyndaǵy rotatsııa máselesi el damýy úshin asa qajetti úderis.
Búgin QR Prezıdenti janyndaǵy Memlekettik basqarý akademııasynda ótip jatqan «Memlekettik qyzmettiń qazaqstandyq úlgisi: mindetteri men damý keleshegi» atty ǵylymı-praktıkalyq konferentsııa barysynda QR Prezıdenti Ákimshiligi basshysynyń orynbasary Baýyrjan Báıbek osylaı málim etti.
Memleket basshysy N. Nazarbaevtyń memlekettik qyzmet jáne kadr saıasaty týraly júktegen mindetterine toqtala kele Prezıdent Ákimshiligi basshysynyń orynbasary Baýyrjan Báıbek, tutastaı alǵanda memlekettik qyzmettegi rotatsııa máselesiniń mańyzdy bolyp otyrǵanyn atap ótti. «Qazaqstan óziniń terrıtorııasy jaǵynan asa aýqymdy el. Degenmen, bizdiń óńirlerdiń damý deńgeıi birkelki emes. Máselen elimizdiń birqatar óńirleri qazirdiń ózinde damý jaǵynan Shyǵys Eýropa, Eýropalyq Odaq elderiniń qatarynda bolsa, keıbir aýdandarymyz múldem arta qalyp otyr. Sonymen qatar, bizdiń belgili bir jergilikti, mentalıtettik, mádenı turǵydaǵy ekonomıkalyq erekshelikter men aıyrmashylyqtar da óńir damýyna áserin tıgizetini aıqyn. Sondyqtan da, búgingi tańda memlekettik qyzmetshiler tek qana Astana men Almaty tóńiregine toptasa bermeı, osy taraptan rotatsııa úderisiniń bolǵany abzal», - dedi B. Báıbek. Onyń aıtýynsha, eldegi memlekettik qyzmet boıynsha rotatsııa máselesi asa qajetti úderis.
