Memlekettik qyzmetshiler arasynda tuńǵysh ret ótetin qazaqsha kúrestiń bas júldesi - avtomobıl
ASTANA. Sáýirdiń 8-i. QazAqparat /Marlan Jıembaı/ - Sáýirdiń 10-ynda elordadaǵy «Astanalyq tsırk» ǵımaratynda, memlekettik qyzmetkerler arasynda qazaqsha kúresten beldesý ótedi.
Bul týraly búgin QazAqparattyń baspasóz ortalyǵynda bolǵan máslıhatta «Til» jýrnalynyń bas redaktory Nurgúl Qaraǵoıshına málim etti.
Onyń atap ótýinshe, «Til janashyry» qoǵamdyq birlestigi men «Til» jýrnalynyń uıymdastyrýymen alǵash ret ótkeli otyrǵan saıysqa elimizdiń 30-ǵa tarta memlekettik mekemesi óz qatysýshylaryn daıyndaǵan. Olardyń qatarynda QR Joǵarǵy soty, UQK, Qarjy polıtsııasy, Qorǵanys, Tótenshe jaǵdaılar, Densaýlyq saqtaý, Mádenıet, Ádilet, Bilim jáne ǵylym, Kólik jáne kommýnıkatsııa mınıstrlikteri, sonymen qatar on oblys pen Almaty, Astana qalalarynyń ákimdikterinde qyzmet etetin memlekettik qyzmetkerler bar. Uıymdastyrýshylardyń palýandarǵa qoıyp otyrǵan sharttarynyń biri - qazaq tilin jetik meńgerýi bolsa, ekinshisi memlekettik qyzmettegi jumys ótili 1 jyldan kem bolmaýy kerek.
«Bul sharany ótkizýdegi maqsat - memlekettik qyzmetkerlerdiń boıynda ultjandylyq, otansúıgishtik sezimderin kúsheıtip, olardyń sportqa degen qyzyǵýshylyǵyn arttyrý. Saıys memlekettik mekeme qyzmetkerleriniń arasynda yntymaqty kúsheıtip, aýyzbirshilikti nyǵaıtady dep esepteımiz», deıdi N.Qaraǵoıshına.
20 men 40 jas aralyǵyndaǵy palýandardyń beldesýi olımpıadalyq júıe boıynsha ótkizilip, oǵan halyqaralyq sanattaǵy tóreshiler qazylyq etetindigin atap ótken N.Qaraǵoıshınanyń sózine qaraǵanda, ulttyq rýhymyzdy asqaqtatyp, qundylyqtarymyzdy dáripteýge baǵyttalǵan bul sharada elimizdiń tanymal ánshileri óner kórsetip, utys oıyndary ótkizilmek.
Palýandar beldesýine demeýshilik kórsetip otyrǵan metsanat, kásipker, «Qurmet» ordeniniń ıegeri Oralbek Botbaı bas júldege altyn tústi «Nıssan» avtokóligin tigip otyr.
Baspasóz máslıhatyna general-leıtenant, Halyq qaharmany Baqytjan Ertaev, «Til janashyry» qoǵamdyq birlestiginiń tóraǵasy Altynbek Ábishev, metsanat Oralbek Botbaı jáne beldesýge bel býǵan memlekettik qyzmetshiler qatysty.
