Memlekettik qyzmetshiler alǵan syılyqtaryn 7 kún ishinde ótkizýi tıis
Departament basshysy Álı Kómekbaev Agenttiktiń jumysy túrli tártip buzýshylyqtardyń aldyn-alýǵa, kásibı memlekettik apparat qurýǵa jáne azamattar men memlekettik qyzmetshilerdiń quqyqtary men zańdy múddelerin qorǵaýǵa baǵyttalǵanyn atap kórsetti.
Memlekettik qyzmet atqarý qoǵam men memleket tarapynan erekshe senim bildirý bolyp tabylatyny jáne memlekettik qyzmetshilerdiń moraldyq-ádeptilik beınesine joǵary talaptar qoıylatynyn jetkizdi. Osy baǵytta jınalysqa qatysýshylarǵa qatań eskertýler jasalyp, tártip buzý áreketteri bolǵan jaǵdaıda tıisti sharalar qoldanylatynyn eskertti.
Onyń sózinshe, jyl basynan beri Túrkistan oblysyndaǵy birqatar memlekettik qyzmetshiler Ádep kodeksiniń talaptaryn saqtamaǵan. Máselen, aǵymdaǵy jyly Kentaý qalasynyń kásipkerlik jáne týrızm bólimi men Otyrar aýdanynyń ádilet basqarmasynyń basshysy, Ordabasy aýdanynyń Bórjar aýyldyq okrýginiń ákimi masań kúıde avtokólik quraldaryn basqarǵan. Bul memlekettik qyzmetshiler tarapynan ádeptilik talaptaryn óreskel buzý.
Nátıjesinde atalǵan tulǵalar atqaryp otyrǵan laýazymdarynan bosatylǵan. Osy rette, Departament basshysy memlekettik qyzmetshilerdiń mas kúıde avtokólik quraldaryn basqarý jáne qyzmettik avtokólik quraldaryn jumystan tys ýaqytta maqsatsyz paıdalaný jaǵdaılaryna jol bermeý maqsatynda reıdtik is-sharalar uıymdastyrylatynyn aıtty. Tártip buzýshylyq anyqtalǵan jaǵdaıda atalǵan tulǵalardyń tártiptik jaýapkershiligi qatań túrde qaralatynyn jınalysqa qatysýshylardyń nazaryna jetkizdi.
Sondaı-aq ol memlekettik qyzmetshilerdiń syılyq jáne syıaqy alý máselesine toqtalyp, olardy qabyldaýǵa quqyǵy joqtyǵyn túsindirdi. Syılyqtar berilgen kúnnen bastap 7 kún ishinde erikti túrde arnaıy qorǵa tapsyrylýy, al alynǵan qarajat eki aptadan aspaıtyn merzimde respýblıkalyq bıýdjetke aýdarylýy qajettigin atap ótti. Bul merzimderdiń buzylýy qylmystyq ne ákimshilik jaýapkershilikke negiz bolatyny qatań eskertildi.