Memlekettik qyzmetshi jumystan tys ýaqytta etıkany ustanýǵa mindetti me

NUR-SULTAN. QazAqparat - Memlekettik qyzmet isteri agenttiginiń tóraǵasy Anar Jaıylǵanova memlekettik qyzmetshilerdiń etıkasy jóninde pikir bildirdi, dep habarlaıdy QazAqparat.

«Memlekettik qyzmetshiniń ádebi - óte mańyzdy másele. Biz olardyń (memlekettik qyzmetshilerdiń - avt.) túngi klýbta júrip, ishimdik ishkeni týraly halyqtyń narazylyǵyn kórgimiz kelmeıdi. Jáne bul memlekettik qyzmetshige jaraspaıdy. Memlekettik qyzmetshi etalon bolýy tıis jáne osy baǵytta jumys isteýdi jalǵastyramyz», - dedi Anar Jaıylǵanova Úkimet úıinde ótken baspasóz máslıhatynda.

Onyń aıtýynsha, memlekettik qyzmetshi jumystan tys ýaqytta da etıkany ustanýǵa mindetti.

«Memlekettik qyzmetshiniń qoǵamdyq oryndarda ishimdikke mas bolyp júrýine jol berýge bolmaıdy. Bul týraly meniń jeke ustanymym da osyndaı», - dedi A. Jaıylǵanova.