Memlekettik qyzmetshi qylmystyq jaýapkershilikten qorqyp, 10 mln. teńgege jýyq alımentti aldyn ala tólep tastaǵan
ASTANA. QazAqparat - Astanada 2003 jyldan beri alıment tólemeı kelgen memlekettik qyzmetshi qylmystyq jaýapkershilikten qorqyp burynǵy áıeli men balalarynyń aldyndaǵy qaryzyn jaýap qana qoımaı, on mıllıon teńgege jýyq alımentti aldyn ala tólep tastaǵan. Bul týraly búgin brıfıngte Astana qalalyq Ádilet departamentiniń basshysy Qanat Mýsın málim etti.
Aıta keterligi, aǵymdaǵy jyldyń basynan jańa mazmundaǵy QR Qylmystyq Kodeksi kúshine engen bolatyn, onda alımentti tólemegeni úshin jaýapkershilikti kúsheıtetin normalar qamtylǵan. Máselen, Qylmystyq Kodekstiń 139-babynda úsh aı boıy alıment tólemegenderdi sot oryndaýshylary qylmystyq jaýapkershilikke tartyp, olardyń eki jylǵa deıin bostandyǵy shektelýi nemese osyndaı merzimge bas bostandyǵynan aıyrylýy múmkin.
«Statıstıkaǵa súıensek, materıaldardyń qylmystyq is qozǵaý úshin joldanǵany týraly habarlama alǵannan keıin tipti qasaqana eregesip tólemeı júrgen boryshkerlerdiń ózi qaryzdarynan tezirek qutylýǵa tyrysady. Máselen, Astanada bir memelkettik qyzmetshi qylmystyq jaýapkershilikke tartylatyny týraly habarlama alǵannan keıin, birden 2003 jyldan beri jınaqtalyp qalǵan qaryzyn tólep, tipti aldaǵy kúnderi úshin aldyn ala 9 mln 483 myń 420 teńge aýdarǵan. Dál osylaısha aldyn ala tólemderdi bir azamat 1 mln 600 myń teńgege, endi biri 1 mln. 200 myń teńgege jasady. Sonymen qosa, astanalyq 8 «boryshker áke» alımentterin óteý úshin aldyn ala 950 myń men 1 mln teńge arasynda qarajat aýdarǵan»,- dedi Qanat Mýsın. Onyń sózine qaraǵanda, atalǵan shara alıment tólemeıtin boryshkerlerden qaryzdy qaıtarýda meılinshe tıimdi bolyp tabylady. Aıta keterligi, qazirgi tańda ishki ister organdaryna alıment tólemegeni úshin qaryzy bar azamattardy qylmystyq jaýapkershilikke tartý týraly 723 usynym jiberilgen. «Qazirgi tańda osy usynymdardyń 80-i boıynsha qylmystyq is qozǵaldy. Qalǵany qaralý barysynda tur», - dedi Qanat Mýsın.
