Memlekettik qyzmetkerlerdiń tarapynan bolatyn dórekilikti tyıý úshin «Qyzmet etıkasy týraly» zań qabyldaý qajet - Á. Báımenov
ASTANA. 2 aqpan. QazAqparat /Jasulan Joldybaev/ - Memlekettik qyzmetkerlerdiń tarapynan bolatyn dórekilikti tyıý úshin «Qyzmet etıkasy týraly» zań qabyldaý qajet.
Bul týraly búgin Astanada ótken dóńgelek ústel otyrysy barysynda Memlekettik qyzmet isteri jónindegi agenttiktiń tóraǵasy Álıhan Báımenov málim etti.
Búgingi ýaqytta memlekettik qyzmetkerler óz taraptarynan dórekilikke jol beretindikterin atap ótken Agenttik tóraǵasy: «Sondyqtan bizdiń naqty usynysymyz «Qyzmet etıkasy týraly» zańdy qabyldaý qajet. Ol týraly qazir usynys engizildi. Biz Úkimettiń bolashaqtaǵy zań shyǵarý josparyna «Qyzmet etıkasy týraly» zańdy usyndyq. Qazir ol talqylaný ústinde», - dedi.
Onyń aıtýynsha, kadr saıasaty bıyl birqatar aýqymdy ózgeristerge ushyramaq. Qazirgi ýaqytta Elbasynyń Joldaýyn oryndaý boıynsha jospar qabyldanyp úlgergen. Sonymen qatar, jyldyń ekinshi toqsanynda kadr saıasaty jónindegi ulttyq komıssııa qurylatyn bolady.
«Biz qazirgi tańda damýshy elderdiń tájirıbesin zertteýdemiz. Damyǵan elderdiń kópshiliginde «Senior Experten Service» degen bar, ıaǵnı turaqty, kásibı negizde jumys isteıtin, osylaısha memlekettik organdardyń jumysynda turaqtylyq pen býyn baılanysyn qamtamasyz etetin joǵary laýazymdy tulǵalar bolady. Olarǵa arnaıy úlken biliktilik talaptary qoıylady», - dep atap ótti Agenttik basshysy.
«Biz alǵashqy joldardy, tetikterdi engizdik. Endi biz «Memlekettik qyzmet týraly» Zańǵa ózgerister engizýmen birge basqarýshylyq qyzmetti qalyptastyrýdyń jańa tetikterin qoǵam nazaryna usynamyz degen úmittemin», - dedi Á. Báımenov.
