Memlekettik qyzmetkerlerdiń mansaptyq joǵarylaýy tek konkýrstyq negizde júzege asady
ASTANA. QazAqparat - Memlekettik qyzmetkerlerdiń mansaptyq joǵarylaýy tek konkýrstyq negizde júzege asady. Búgin Parlament Senatynyń jalpy otyrysynda QR Memlektetik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov osylaı málim etti. Eske salaıyq, jalpy otyrysta «Qazaqstan Respýblıkasynyń memlekettik qyzmeti týraly» zań jobasy talqylanǵan bolatyn.
Atalǵan qujat Elbasy aıqyndaǵan «100 naqty qadam» Ult josparyndaǵy memlekettik apparattyń kásibıligi men derbestigine baǵyttalǵan sharalardy júzege asyrýǵa baǵyttalady. «Qujat tutastaı alǵanda memlekettik qyzmet salasynda ashyq konkýrstyq irikteýdi qamtamasyz etýge, quzyrettilik negizinde maqsattyq, ıaǵnı laýazymdyq joǵarylatýǵa, nátıjege baılanysty eńbekaqyny anyqtaýǵa baǵyttalady. Bul sharalar memlekettik qyzmettegi tamyr-tanystyq, aǵaıynǵa burýshylyq pen zańsyz qamqorshylyq jaǵdaılaryn barynsha joıady», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov. Onyń aıtýynsha, zań jobasy boıynsha alǵash ret memlekettik qyzmetke qabyldaý úsh satyly konkýrstyq irikteý arqyly júzege asatyn bolady. Birinshi kezeńde úmitkerler zańdardy bilý men quzyrettilik boıynsha testileýden ótedi. Ekinshi kezeńde agenttik arnaıy suhbattasý arqyly úmitkerdiń jeke qasıetterin tekseredi. Úshinshi kezeńde memlekettik organ kandıdattyń kásibı bilimin, biliktiligin aıqyndaıtyn bolady. Konkýrstan sátti ótkender úshin tálimgerler belgilene otyryp, úshten alty aıǵa deıingi aralyqta synaq merzimi belgilenedi. Synaq merziminen óte almaǵandar agenttiktiń kelisimimen jumystan bosatylýy tıis. «Memlekettik qyzmetkerlerdiń mansaptyq joǵarylaýy tek konkýrstyq negizde júzege asatyn bolady. Bul rette quzyretpen qatar, tómengi laýazymdaǵy jumys ótili de talap etiledi. Burynǵy depýtattardyń, saıası qyzmetkerlerdiń, sýdıalardyń, «B» korpýsynyń memlekettik ákimshilik laýazymdaryna ornalasý tártibi jeńildetiledi. Bul úshin komıssııa sheshimi ǵana qajet etiledi», - dedi Q. Qojamjarov. Budan bólek, memlekettik qyzmetshilerdiń kásibı áleýetin neǵurlym tıimdi paıdalanýdy qamtamasyz etý maqsatynda memlekettik ákimshilik qyzmetterdiń rotatsııasy júzege asyrylady. Al memlekettik qyzmetshiler basqa jerge rotatsııa kezinde jekeshelendirý quqyǵynsyz memlekettik turǵyn jaımen qamtamasyz etiletin bolady. Sonymen qatar, memlekettik qyzmetkerler úshin nátıjelilik boıynsha eńbekaqy júıesi engiziledi. Bul «birdeı eńbek úshin birdeı eńbekaqy» qaǵıdatyn qamtamasyz etip, osy maqsatta quqyqtyq negiz belgilenedi. Birshama talqylaýdan soń Senat atalǵan qujatty qabyldady. Parlament qabyldaǵan zań endi Memleket basshysynyń qol qoıýyna joldanady.
