Memlekettik qyzmetkerlerdiń aılyq jalaqylary eńbek naryǵynda básekege qabiletsiz - A.Shomanov
ASTANA. Jeltoqsannyń 3-i. QazAqparat /Aıdar Ospanalıev/ - Memlekettik qyzmetkerlerdi attestatsııalaýǵa qatysty qoldanystaǵy júıe tek qaǵaz júzinde ǵana iske asyrylýda.
Atalmysh júıe naqty nátıjege negizdelip otyrǵan joq. Nátıjesinde olardyń laýazymy qyzmet jetistigine saı óspeıdi jáne kadrlarǵa tólenetin qarjy kólemi de tıisinshe ulǵaıtylyp otyrǵan joq. Bul týraly búgin Astanada «Memlekettik qyzmet pen jańa basqarý sheshimderin quqyqtyq qamtamasyz etý» atty taqyrypta ótken dóńgelek ústel otyrysynda Memlekettik qyzmet isteri jónindegi agenttik tóraǵasynyń orynbasary Asqar Shomanov málim etti, dep habarlaıdy QazAqparat.
Onyń pikirinshe, qazir memlekettik qyzmetkerlerdiń aılyq jalaqylary naqty eńbek naryǵymen salystyrǵanda básekege qabiletsiz. Óz kezeginde ol memlekettik qyzmetke biliktiligi joǵary mamandardy tartýǵa kedergi bolyp, kóp jaǵdaıda kerisinshe bilikti mamandardyń ózge salalarǵa jumysqa aýysýyna negiz bolyp otyr. «Jalpy memleketik qyzmettegi adam resýrstaryn tıimdi basqarýda qyzmet etıkasy men jemqorlyqpen kúres máseleleri mańyzdy orynǵa ıe.
Bul baǵytta árıne tártiptik keńester men Memlekettik qyzmet isteri jónindegi agenttik ókilderi birshama jumystar atqarýda. Soǵan qaramastan jergilikti atqarýshy jáne ortalyq memlekettik organdarda zań buzý áreketteri áli de bolsa oryn alyp otyr. Keı jaǵdaıda memlekettik organ jetekshileriniń tártiptik keńesterdiń kinálilerdi jaýapqa tartý jónindegi nusqaýlaryn oryndamaıtyn kezderi de bolady», dedi agenttik tóraǵasynyń orynbasary.
Onyń sózine qaraǵanda, memlekettik qyzmettegi azamattardy basqarý ınfraqurylymynda da problemalar bar. «Memlekettik qyzmettegi azamattardyń kásibı deńgeıiniń tómendigi memlekettik qyzmettegi kadr máselesiniń turaqsyzdyǵyna baılanysty bolyp otyr. Sondaı-aq jaýapty hatshy ınstıtýty da kadr máselesin turaqtandyrýǵa qatysty mindetin tolyq atqara almaı otyr», dedi A.Shomanov.
