Memlekettik qyzmetkerlerdiń Ádep kodeksin buzý jaǵdaılary sıredi - Jazıra Jylqyshıeva
ASTANA. QazAqparat - Elordalyq memlekettik qyzmetkerler ádep normasyn buzýdy azaıtty. Bul týraly dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń basshysy Jazıra Jylqyshıeva elorda ákimdiginde ótken baspasóz máslıhatynda málim etti, dep habarlaıdy QazAqparat tilshisi.
«2017 jyly Astanada memlekettik qyzmetkerlerdiń ádep normasyna qatysty 54 másele qaralsa, ótken jyly bul kórsetkish 33-ke azaıdy. Al Ádep kodeksin buzý oqıǵasy boıynsha ótken jyly 5 is qozǵaldy, al onyń aldyńǵy jyly 26 is qaralǵan bolatyn. Odan bólek, 2018 jyldyń qorytyndysy boıynsha jergilikti atqarýshy organ qyzmetkerleri arasynda ishimdik qoldaný oqıǵasy tirkelmegendigin aıtyp ótken jón», - dedi ol.
Onyń aıtýynsha, aıtýly kórsetkishke sebep, memlekettik qyzmetkerler arasynda júrgizilgen profılaktıkalyq jumystardyń nátıjesi.
«2017 jyly elordalyq memlekettik qyzmetkerler arasynda memlekettik qyzmet jáne ádep normasyna qatysty 24 profılaktıkalyq shara uıymdastyrylsa, ótken jyly 34 shara ótkizildi. Sonymen qatar, elordalyq memqyzmetkerlerdiń jalaqysy 2,5 esege ósirildi, bul da qyzmetti adal atqarýǵa óz áserin tıgizedi», - dedi J.Jylqyshıeva.
Odan bólek, departament basshysynyń deregine súıensek, qala ákimdigine elordalyq memqyzmetkerler úshin turǵyn úı nesıesin berýde arnaıy jeńildikter qarastyrý usynyldy jáne olarǵa qalalyq Qoǵamdyq densaýlyq saqtaý basqarmasymen birlese otyryp tegin medıtsınalyq tekserý uıymdastyryldy.
Buǵan deıin habarlaǵanymyzdaı J.Jylqyshıeva Astanada memlekettik organdarda 190 bos oryn baryn aıtyp ótken bolatyn.
