Memlekettik qyzmetkerlerdiń 57,8 paıyzyn áıel azamattar quraıdy
ASTANA. Naýryzdyń 17-si. QazAqparat /Qanat Mámetqazyuly/ - Qazaqstandaǵy memlekettik qyzmetkerlerdiń 57,8 paıyzyn áıel azamattar quraıdy. Búgin QR Prezıdenti janyndaǵy Adam quqyqtary jónindegi komıssııanyń otyrysy barysynda baıandama jasaǵan QR Memlekettik qyzmet isteri jónindegi agenttik tóraǵasy Qaırat Nurpeıisov osylaı málim etti,
dep habarlaıdy QazAqparat.
«Memlekettik qyzmet kadrlarynyń monıtorıngtik málimetterine sáıkes, 2010 jylǵy qańtardaǵy jaǵdaı boıynsha memlekettik qyzmettegi áıelder sany 56 myń 54 adamdy qurap otyr. Bul respýblıkadaǵy barlyq memlekettik qyzmetkerlerdiń 57,8 paıyzyna teń. Sonymen birge, elimizdiń ortalyq memlekettik organdary men óńirlerinde sheshim qabyldaý deńgeıindegi 30 myń 418 laýazymdy qyzmetter bar. Bunyń 13 myń 603-in, ıaǵnı 44,72 paıyzyn áıelder ıelengen», dedi Q. Nurpeıisov.
Onyń aıtýynsha, bundaı statıstıka Qazaqstandaǵy memlekettik qyzmet júıesi boıynsha genderlik teńdiktiń saqtalyp otyrǵanyn bildiredi. Sonymen birge, elimizde memlekettik qyzmettegi kópulttylyq qaǵıdaty da saqtalǵan. Máselen, keltirilgen málimetterge qaraǵanda, qazirgi tańda Qazaqstandaǵy memlekettik qyzmette 59 ulttyń ókili jumys isteıdi. «Jalpy, respýblıka boıynsha memlekettik qyzmetkerlerdiń sany 96 myń 935 adamdy quraıdy. Bunyń ishinde qazaqtar - 82 myń 257 adam, orystar - 9 myń 788, ýkraınder - 1 myń 446, tatarlar - 790, nemister - 504, ózbekter - 415, kárister - 389, uıǵyrlar - 379, belarýstar - 214, polıaktar - 148, basqa ult ókilderi - 605 adamdy quraıdy», dedi Agenttik tóraǵasy.
