Memlekettik qyzmetkerlerdi etnıkaaralyq qatynastar salasynda jumys isteý tehnologııasyna oqytý mańyzdy

ASTANA. 23 sáýir. QazAqparat - Barlyq deńgeıdegi memlekettik qyzmetkerler, etno-mádenı ortalyq ókilderi, saraptamalyq qaýymdastyqtar men buqaralyq aqparat quraldary ókilderin etnıkaaralyq qatynastar salasynda jumys isteý tehnologııasyna oqytý mańyzdy. Búgin Astanada Qazaqstan halqy Assambleıasynyń 20-sessııasy qarsańynda ótken Assambleıa Keńesiniń keńeıtilgen otyrysy barysynda QR Memlekettik hatshysy Marat Tájın osylaı málim etti.

«Keıde artyq aıtylǵan bir aýyz sózdiń, keıde saýatsyz jarııalanǵan bir ǵana maqalanyń, keıde sátsiz shyqqan telearnadaǵy kommentarııdiń aqyry aıtarlyqtaı problema týǵyzýy múmkin. Barlyq deńgeıdegi memlekettik qyzmetkerlerdiń mádenıeti, sarapshylar qaýymdastyǵynyń mádenıeti, BAQ mádenıeti, sondaı-aq olardy etnıkaaralyq qatynastarmen qarym-qatynas dúnıesine oqytý - bul tótenshe mańyzdy másele. Eger memlekettiń turaqty damýy týraly aıtatyn bolsaq, onda bizge osy baǵyttaǵy memlekettik saıasatty júzege asyrý úshin ortaq túsinik, ortaq algorıtm kerek», - dedi M. Tájın. Onyń aıtýynsha, bul qaǵıdatty másele. Sondyqtan da, ony jedel sheshý qajet. Bul rette Memlekettik hatshy ultaralyq, etnıkaaralyq qatynastardy zertteıtin arnaıy ortalyqtyń Memlekettik basqarý akademııasynda qyzmet etip jatqanyn aıta kele, bul qurylymdy odan ári keńeıte túsýdiń qajettiligine toqtalyp ótti. «Keleshekte osy ortalyqtyń bazasynda etnıkaralyq qatynastardy zertteıtin, boljaıtyn memlekettik strategııalyq ortalyq qurǵan mańyzdy», - dedi M. Tájın.