Memlekettik qyzmetkerge ınvestıtsııalyq paı qorlarynyń salymshysy bolýǵa, sodan tabys tabýǵa ruqsat beretin zań qabyldandy - Parlament
ashanyń 4-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik fýnktsııalardy oryndaýǵa ýákiletti adamdar men olarǵa teńestirilgen adamdardyń quqyqtyq jaǵdaıy máseleleri boıynsha tolyqtyrýlar engizý týraly» jańa zań jobasy boıynsha kelisim komıssııasynyń usynystary talqylandy.
Nátıjesinde qujat qabyldanyp, Memleket basshysynyń qol qoıýyna jiberildi, dep habarlaıdy QazAqparat.
Esterińizge sala keteıik, atalǵan zań jobasy memlekettik apparattyń laýazymdy adamdary men olarǵa teńestirilgender qyzmetiniń ashyqtyǵyn arttyrý, sondaı-aq olardyń baǵaly qaǵazdar naryǵyn damytý jónindegi memlekettik sharalarǵa qatysý múmkindikterin keńeıtý maqsatynda ázirlengen.
Halyqaralyq tájirıbege sáıkes halyqtyń jınaqtaryn baǵaly qaǵazdarǵa belsendi túrde ınvestıtsııalaýǵa tartpaı, baǵaly qaǵazdar naryǵyn damytý múmkin emes. Bul rette memlekettik apparattyń ókilderi jeke ınvestorlar tobynyń, onyń «ekonomıkalyq» mentalıteti men kózqarasynyń qalyptasýyna belsendi túrde septigin tıgizedi dep boljanýda. Sondaı-aq memlekettik organdar men uıymdar qyzmetshileriniń óz jınaqtaryn qarjy quraldaryna ınvestıtsııalaý boıynsha qajetti bilimi jáne jumys tájirıbesi bolýy mańyzdy bolyp tabylady. Osyǵan baılanysty zań jobasy zańnamany memlekettik fýnktsııalardy oryndaýǵa ýákiletti adamdar men olarǵa teńestirilgen adamdarǵa ınvestıtsııalyq paı qorlarynyń paılaryn satyp alýǵa jáne olardan tabys alýǵa ruqsat etetin normalarmen tolyqtyrylǵan.
Zańdy qabyldaý sybaılas jemqorlyq quqyq buzýshylyq faktilerin, onyń ishinde óz atynan emes bógde adamdardyń atynan, jasyryn, búrkenshik atpen jáne basqasha da azamattyq-quqyqtyq mámileler jasasý faktilerin azaıtýǵa, azamattardyń ınvestıtsııalyq belsendiligin jáne qarjylyq saýattylyǵyn arttyrýǵa, halyqtyń qarjy sektoryndaǵy memlekettik sharalarǵa senimin kóterýge jaǵdaı jasaıdy.
