Memlekettik qyzmetkerdiń jaýapkershiligi eselendi - Serik Qazbaǵambetov
«Ákimshilik rásimder týraly» Zań buǵan deıin memlekettik organnyń ishki qarym-qatynasyn rettedi. Endi Ákimshilik rásimdik-protsestik kodeks qoldanysqa endi. Syrtqa rásimdik jumys jeke jáne zańdy tulǵalarmen aradaǵy qatynasty retteıdi.
«Ákimshilik quqyqbuzýshylyq týraly kodeks pen Ákimshilik rásimdik-protsestik kodeks eki qujat. Qandaı da bir ereje buzylsa, talap oryndalmasa, memlekettik qyzmetkerler ishki jaýapqa tartylady. Sonymen birge memlekettik qyzmetker óz qatesin túzete alady. Máselen, ákimshilik akt shyǵaryldy. Qatelik bolsa, adam sotqa bara almaıdy. Sotqa deıingi tártip boıynsha sol memlekettik organǵa qaıta shaǵym túsiredi. Shyn máninde qate ketse, úsh kúnde túzetiledi. Al qatelik bolmasa zańǵa súıenip, joǵary turǵan organǵa joldaıdy. Onyń da jaýaby qanaǵattandyrmasa, sotqa bara alady. Sot aryzdy qabyldaıdy. Qosymsha qujatty suratady. Bárin de qarap, onlaın tekserip otyrýǵa bolady», - dedi Muǵaljar aýdanaralyq ádilet basqarmasynyń basshysy Serik Qazbaǵambetov. Onyń aıtýynsha, memlekettik qyzmetkerdiń jaýapkershiligi artyp, ótinish, aryz, shaǵymǵa jaýap berý kezinde sapa artady. ıAǵnı, sheshimdi qaı zańǵa súıenip shyǵarǵanyn anyq kórsetýi tıis.
«Aryz, shaǵym, sosyn tórt túrli ótinish bar. Ótinishke habarlama, usynys, ún salý, suranys kiredi. Ótinishtiń bári ońtaıly jolmen qaralady. Olarǵa ákimshilik akt shyǵarylmaıdy. Adamdar osyny ajyrata bilýi tıis. Aryz, shaǵym 15 jumys kúninde qaralady. Qıyn, biraq jumys sapasy artady. Bári ýaqytty talap etedi. Mamandar jańa júıemin jumys isteýge tez mashyqtanady dep oılaımyn. Biz tek «E-ótinish» jobasymen jumys isteımiz. Qaǵaz qoldanbaımyz», - dedi Serik Qazbaǵambetov.
Aıta keteıik, búgin Prezıdent Qasym-Jomart Toqaev qol qoıǵan Qazaqstan Respýblıkasynyń jańa Ákimshilik rásimdik-protsessýaldyq kodeksi kúshine endi.
Odan bólek, QazAqparat Ákimshilik rásimdik-protsestik kodekstiń negizgi normalary týraly habarlaǵan bolatyn.
