Memlekettik qyzmetke úmitkerlerdi testileýge jiberý sharttary jeńildetildi
ASTANA. QazAqparat - Aǵymdaǵy jyldyń 1 naýryzynan bastap memlekettik qyzmetke úmitkerlerdi testileýge jiberýdiń sharttary aıtarlyqtaı jeńildetildi.
QR Memlekettik qyzmet isteri agenttiginiń málimetinshe, barlyq nıet bildirýshiler testileýge úıden shyqpaı jazyla alady. Internet arqyly olar «eleketrondyq úkimettiń» (egov.kz) veb-portalyna kirip, «Jumysqa ornalastyrý» bóliminde «Testileýge jazylý» qyzmetin tańdaı alady. Eger qol astynda ınternet bolmasa, jaqyn ornalasqan HQKO nemese Memlekettik qyzmet isteri agenttiginiń aýmaqtyq departamentterine júginý arqyly testileýge tirkelýge bolady. Ol úshin ózimen tek jeke kýáliktiń bolýy jetkilikti. Tirkeý barysynda ár úmitker testileýdiń orny, kúni men ýaqytyn táýelsiz tańdaı alady.
Jańa zańnamaǵa sáıkes, azamattar bos laýazymǵa ornalasýǵa konkýrs týraly habarlamany kútpesten, ózine yńǵaıly ýaqytta testileýden ótedi. Bul testileýge qatysýshylardyń sanyn eki eseden astamǵa ósirýge múmkindik berdi. Aýdandyq jáne aýyldyq deńgeıdegi tómengi laýazymdar úshin jeńildetilgen jeke baǵdarlama engizildi.
Bul baǵdarlama turǵysynda kandıdattar buryn bolǵan segiz zańnyń ornyna alty zań boıynsha testileýden ótedi. Osy rette, ár zań aıasynda beriletin jaýaptyń ýaqyty kóbeıtildi. Joǵary turǵan baǵdarlama boıynsha testileýdiń oń qorytyndylary tómen turǵan baǵdarmalar úshin de jaraıdy. Birinshi baǵdarlama boıynsha berilgen sertıfıkat ekinshi jáne úshinshi baǵdarlamalar boıynsha sertıfıkat talap etiletin konkýrstarǵa jaraıdy. Ekinshi baǵdarlama boıynsha berilgen sertıfıkat úshinshi baǵdarlamany qamtıdy.
Sonymen qatar, testileýge qatysýshylardyń jaýapkershilikteri kúsheıtildi. Eger azamat testileýden ótpese, óte almaǵan testileý baǵdarlamasyna qaramastan, kelesi testileýge úsh aıdan kem emes merzimnen keıin qatysa alady. Personaldy basqarý qyzmetterimen testileý nátıjeleriniń rastyǵyn tekserý múmkindigi keńeıtildi.
«Aǵymdaǵy jyldyń 1 naýryzyna deıin berilgen sertıfıkattar olarda kórsetilgen merzim ishinde jaramdy ekendigin atap ótken jón. 1 naýryzǵa deıin testileýden óte almaǵan azamattar úsh aılyq merzimdi kútpesten kelesi testileýden óte alady», - delingen agenttik málimetinde.
