Memlekettik qyzmetke test tapsyrý tolyqtaı elektrondy júıege kóshti
Memlekettik qyzmettik buıryqtar tizbesine ózgerister men tolyqtyrýlar engizildi. Bul týraly óńirlik ÓKQ-da ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń orynbasary Rýslan Tuńǵyshbaev málimdedi.
"Osy ýaqytqa deıin testileýden ótken úmitkerler 20 mınýt ishinde testileýden ótkenin rastaıtyn sertıfıkattardy qaǵaz túrinde alatyn edi. Qazirgi ózgeriske oraı úmitkerler testileýden oń nátıje kórsetken kezde test nátıjeleri E-qyzmet yqpaldastyrylǵan aqparattyq júıesinde saqtalady. Odan ári, bos memlekettik ákimshilik laýazymdarǵa qujat tapsyrǵan jaǵdaıda personaldy basqarý qyzmeti (kadr qyzmeti) mamandary úmitkerdiń test nátıjelerin E-qyzmet yqpaldastyrylǵan aqparattyq júıesinen kóre alady. ıAǵnı, mundaı tásil qaǵazbastylyqty azaıtady", - deıdi Rýslan Tuńǵyshbaev.
Sonymen qatar, spıkerdiń aıtýynsha, ózgeriste «B» korpýsynyń laýazymyna úmitkerlerdiń jeke qasıetterin baǵalaýǵa arnalǵan testileý stresske ornyqtylyq, bastamshyldyq, jaýapkershilik, qyzmetti tutynýshyǵa jáne ony habarlandyrýǵa baǵdarlaný, adaldyq, ózdiginen damý, jedeldilik, yntymaqtastyq jáne árekettestik, qyzmetti basqarý, sheshim qabyldaý, kóshbasshylyq, strategııalyq oılaný, ózgeristerdi basqarý deńgeıin anyqtaýǵa arnalǵan tapsyrmalardan turady.
Aıta keteıik, testterdi oryndaý úshin 100 mınýt ýaqyt beriledi. Eger test nátıjesi 50 paıyzdan tómen bolsa, ol azamat testileýden ótpedi dep tanylady.
