Memlekettik qyzmetke ótinimdi onlaın jiberýge bolady

NUR-SULTAN. QazAqparat – Memlekettik qyzmetke úmitkerler ótinimderdi ınternet arqyly bere alady. Bul týraly QR Memlekettik qyzmet isteri agenttiginiń tóraǵasy Anar Jaıylǵanova aıtyp berdi, dep habarlaıdy QazAqparat tilshisi.

Spıkerdiń aıtýynsha, úmitkerler ınternet arqyly ótinim bere alatyn «Memlekettik qyzmetke qabyldaý» portaly úshin iqyzmet.gov.kz domendik ataýy alynǵan.

«Memlekettik qyzmetke qabyldaý» protsesi pılottyq synaqtan ótip jatyr. Jańǵyrtylǵan protsesterdi iske asyrý nátıjesinde birqatar nátıjeler kútilýde: memlekettik organdardaǵy barlyq kadrlyq protsesterdi ońtaılandyrý jáne avtomattandyrý, memlekettik qyzmetshiniń jumysyna qolaıly jaǵdaı jasaý, kadrlyq is júrgizý aıasynda qalyptasatyn barlyq qujattardy elektrondy formatqa kóshirý (nemese avtomattandyrý esebinen keıbir qujattardy qurýdan bas tartý), qyzmetkerlerdi basqarý protsesin baqylaý», - dedi A. Jaıylǵanova QR Memlekettik qyzmet isteri agenttiginiń alqa otyrysynda.