Memlekettik qyzmetke kelem deýshilerge jańa talaptar qoıylatyn boldy
ASTANA. QazAqparat - Elimizde memlekettik qyzmetke kelem deýshilerge qoıylatyn talaptar ózgerdi. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Memlekettik qyzmet departamentiniń dırektory Maqsut Óteshev jýrnalıstermen bolǵan brıfıngte málim etti.
Maqsut Óteshevtiń aıtýynsha, biliktilik talaptary árbir memlekettik organ tarapynan derbes jasalady jáne mindetti túrde Memlekettik qyzmet isteri jáne sybaılas jemqorlyqqa qarsy is-qımyl agenttigimen kelisiledi. Biliktilik talaptary barlyq memlekettik laýazymdarǵa bilimi, eńbek ótili jáne quzyrettiligi boıynsha biryńǵaı talaptar ornatady.
Bilimge talaptar laýazym deńgeıine baılanysty qoıylady. Birqatar laýazymdarǵa, mysalǵa, aýyldyq jáne aýdandyq deńgeıde ortadan keıingi, tehnıkalyq jáne kásibı bilimder ruqsat etiledi. Ortalyq deńgeıde úmitkerdiń Prezıdent janyndaǵy Memlekettik basqarý akademııasynda bilim alǵandyǵy nemese sheteldik bilimi bar bolýy eskeriledi. Mundaı bilimi bar memlekettik laýazymǵa úmitkerlerge memlekettik qyzmettegi eńbek ótiliniń qysqalaý merzimi talap etiledi (mysalǵa 5 jyldyń ornyna 3 jyl memlekettik qyzmettegi ótilim).
Memlekettik qyzmetke keletinder úshin jumys ótili mańyzdy ról atqarady. Qazir memlekettik qyzmetke memlekettik emes mekemelerde, quqyq qorǵaý jáne arnaıy memlekettik organdarda jumys ótilimi bar azamattar da kele alady.
Mansaptyq úlgi ıkemdiligin qamtamasyz etý jáne jeke sektordan daryndylardy tartý úshin memlekettik organdardaǵy mindettermen uqsas qyzmet salalarda aıtarlyqtaı jumys ótili bar azamattar arasynda «ashyq» irikteý júrgiziledi.
Sonymen birge, memlekettik apparatty kásibılendirý maqsatyndaǵy jańa tásilderdi iske asyrý úshin jańa talap boıynsha, tómengi turǵan laýazymdaǵy azamattyń bir jyldan kem emes jumys ótili bolǵan jaǵdaıda memlekettik qyzmette kezeń-kezeńimen jyljytý tetegi engiziledi.
Memlekettik qyzmetke úmitkerlerdiń kvalıfıkatsııalyq talaptary memlekettik qyzmettegi jańa tásilderge saı jetildirilýde.
Atalǵan saraptamanyń negizinde, endigi kezekte áskerı qyzmettegi, Parlament pen maslıhat depýtatynyń mártebesindegi, sot jáne halyqaralyq qyzmetkerleri mártebesindegi jumys ótili eskeriletin bolady.
Bıylǵy jyly kvalıfıkatsııalyq talaptarǵa jańa «biliktilik» uǵymy engizildi. Bul árbir qyzmetkerge tıimdi jumys jasaý úshin qajetti bilim men daǵdylardan turatyn jıyntyq.
Biliktilikti baǵalaýdyń avtomattandyrylǵan júıesi 12 testtik jumystan quralǵan. Basshylyq qyzmetine úmitkerlerge 10 biliktilik deńgeıin anyqtaýǵa 90 mınýt, qalǵan qyzmetke úmitkerler úshin 8 biliktilik deńgeıin anyqtaýǵa - 75 mınýttan beriledi.
Atalǵan jyldyń basynan beri jeke qasıetterin baǵalaýda testtileýden ótkenderdiń 76,3% joǵary baǵa aldy
