Memlekettik qyzmetke kadr irikteýde úmitkerdi baǵalaý júıesi kerek – Agenttik tóraǵasy

NUR-SULTAN. QazAqparat – Memlekettik qyzmetke kadrlardy irikteý kezinde úmitkerdiń ártúrli qyrlaryn qamtıtyn baǵalaý júıesi kerek. Bul týraly Memlekettik qyzmet isteri agenttiginiń tóraǵasy Darhan Jazyqbaev Qoǵamdyq keńestiń jańartylǵan quramynyń alǵashqy resmı kezdesýinde málim etti.

«Kadrlardy irikteý kezinde úmitkerdiń qabilettilik deńgeıin anyqtaı otyryp, zańnamany da, sandyq jáne mátindik aqparatpen jumys isteı alýyn da, suhbat arqyly quzyreti, keıster men sıtýatsııalyq tapsyrmalardy sheshý sııaqty kezeńderdi qamtıtyn baǵalaý júıesi kerek» - dedi kezdesý barysynda QR Memlekettik qyzmet isteri agenttiginiń tóraǵasy Darhan Jazyqbaev.

Basqosý barysynda, sondaı-aq Prezıdenttiń «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵy aıasynda Agenttiktiń aldyna qoıylǵan birqatar mindetteri talqylandy. Sonyń ishinde memlekettik qyzmetke kadrlardy irikteý máselelerine erekshe nazar aýdaryldy.

Sondaı-aq, Agenttik tóraǵasy Qoǵamdyq keńes múshelerimen jumystyń basym baǵyttaryn tanystyryp ótti. Onyń aıtýynsha, memlekettik qyzmetke irikteýdiń qoljetimdiligi, testileý men suhbattasýdy onlaın ótkizý arqyly avtomattandyrý, memlekettik qyzmetshilerdiń áleýmettik kepildigi men quqyqtaryn qorǵaý, sybaılas jemqorlyq pen múddeler qaqtyǵysy sekildi máselelerge erekshe mán berilip jatyr. Jıyn qorytyndysy boıynsha Qoǵamdyq keńestiń jumysyn júıeli ári turaqty júrgizý maqsatynda 15 qoǵam ókilinen turatyn úsh komıtet quryldy.

Aıta keteıik, quramy qaıta bekitilgen Qoǵamdyq keńeske «Aýyl» halyqtyq-demokratııalyq patrıottyq partııasy, «Evrazıan Ekspert Kansıl» qoǵamdyq keńesi, «HR menedjerler qaýymdastyǵy» QB úılestirý keńesi men QR Prezıdenti janyndaǵy Qazaqstan strategııalyq zertteýler ınstıtýtynyń ókilderi kirip otyr.