Memlekettik qyzmetke qabyldaýda psıhometrııalyq test synaǵy engiziletin bolady - Q. Nurpeıisov
ASTANA. 14 maýsym. QazAqparat /Qanat Mámetqazyuly/ - Memlekettik qyzmetke qabyldaý sharttaryna engiziletin ózgeristerge sáıkes jańadan psıhometrııalyq test synaǵy qoldanylatyn bolady.
Búgin QR Prezıdenti janyndaǵy Memlekettik basqarý akademııasynda ótip jatqan «Memlekettik qyzmettiń qazaqstandyq úlgisi: mindetteri men damý keleshegi» atty ǵylymı-praktıkalyq konferentsııa barysynda QR Memlekettik qyzmet isteri agenttiginiń tóraǵasy Qaırat Nurpeıisov osylaı málim etti.
«Bizdiń agenttik ázirlegen memlekettik qyzmetke kadrlardy tańdaý júıesi boıynsha iriktep alý jumysy búgingiden birshama ózgeretin bolady. Zańnamany bilý deńgeıin tekseretin testilik baqylaýdan bólek, irikteý barysynda kandıdattar taǵy bir testilik synaq ótetin bolady. Engiziletin jańa testide memlekettik qyzmetke úmitkerdiń minez-qulqyna basa mán berile otyryp, keleshek qyzmetkerdiń jumys tıimdiligi baǵalanyp, boljanady. Bul úshin qyzmetshiniń kásibı tulǵalyq quzyrettiligin baǵalaýǵa baǵyttalǵan arnaıy psıhometrııalyq test ázirlengen, ol synaqtan ótkizilip jatyr», - dedi Q. Nurpeıisov. Onyń aıtýynsha, atalǵan test memlekettik qyzmetke kandıdattyń aǵymdaǵy quzyretin ǵana aıqyndap qoımaıdy, sonymen qatar onyń memlekettik qyzmetshi retindegi keleshek damýy boıynsha áleýetti múmkindikteri de aıqyn baǵalanady. «Buǵan kóshbasshylyq, strestke ornyqtylyq, tez aralasqyshtyq sekildi minezderin baǵalaý da jatady», - dedi agenttik tóraǵasy.
