Memlekettik qyzmetke qabyldaý salasyna engiziletin moratorıı jaıly aıtýǵa áli erte - Jaıylǵanova

NUR-SULTAN. QazAqparat – QR Memlekettik qyzmet isteri agenttiginiń tóraǵasy Anar Jaıylǵanova memlekettik qyzmetke qabyldaý salasyna engizilýi múmkin moratorıı týraly pikir bildirdi, dep habarlaıdy QazAqparat tilshisi.

«Shynyna kelgende bul turǵyda moratorıı týraly aıtýǵa áli erte. Biz ol týraly oılaǵanbyz. Alaıda moratorıı boıynsha túpkilikti sheshim áli qabyldanǵan joq. Sebebi bıyldyń ózinde Memleket basshysynyń tapsyrmasyn (memlekettik apparatty 25 paıyzǵa qysqartý týraly) jospar boıynsha kedergisiz oryndaımyz», - dedi dedi Anar Jaıylǵanova OKQ-da ótken baspasóz máslıhatynda.

Agenttik basshysynyń aıtýynsha bul másele áli talqylaý deńgeıinde ǵana tur.

«Prezıdent Ákimshiligi tarapynan naqty sheshim bolǵan jaǵdaıda qosymsha habarlaımyn», - dedi ol.

Eske sala ketsek buǵan deıin Anar Jaıylǵanova memlekettik apparatty qysqartýǵa qatysty jumys josparymen bólisken bolatyn.

«Biz moratorıı jarııalamaqpyz. Másele zerttelip, maquldaý satysynda tur. Belgili bir ýaqyt ishinde eshkimdi memlekettik qyzmetke qabyldaý konkýrstaryna moratoıı jarııalamaqpyz. 2020 jyldyń sońyna deıin, 2021 jylda da solaı bolatyn sekildi. Sebebi qysqartý týraly aıtýmen qatar jumysqa azamattardy alý durys emes», - degen edi Anar Jaıylǵanova Prezıdenttik jastar kadrlyq rezervindegi azamattarmen elordadaǵy kezdesý barysynda.