Memlekettik qyzmetke irikteýde zań bilý talaptary azaıtylyp, adamnyń biliktiligin synaý testileri kúsheıtiledi - Á.Baımenov
ASTANA. QazAqparat - Memlekettik qyzmetke irikteý úshin otandyq test ázirleýge alǵash ret qarjy bólindi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Memlekettik qyzmet isteri agenttiginiń basshysy Álıhan Baımenov málim etti.
Memlekettik qyzmet salasyndaǵy eń úlken baǵyttardyń biri adamnyń qabiletin, quzyretin baǵalaý ekendigin basa aıtqan agenttik basshysy: «Bul óte kúrdeli jumys. Biz 1999 jyldan beri zańnama boıynsha testileýdi tájirıbe júzinde qoldanyp kelemiz. Al keıbir damyǵan elderde testileý adamnyń quzyretin, qabiletin baǵalaýǵa negizdeledi. Biraq bizdiń tarıhymyzda mundaı tájirıbe bolmaǵandyqtan bul iste óte saqtyqpen qaraýymyz kerek. Sondyqtan da byltyr «A» korpýsyna irikteý kezinde osy testileýdiń otandyq úlgisin synaqtan ótkizdik», - dedi. Onyń atap ótýinshe, qazirgi ýaqytta «A» korpýsyna irikteý kezinde halyqaralyq eń úzdik kompanııalardyń biri «Hill International»-men birlesip ázirlengen jańa test synaqtan óktizilýde. Budan bólek elimizde alǵash ret otandyq osyndaı testileý jasaýǵa qarjy bólingen. Qazirgi ýaqytta agenttik konkýrs arqyly seriktes tańdap, atalǵan testini durys daıyndaý baǵytyndaǵy jumystardy qolǵa alǵan. «Al kelesi jyldan bastap birte-birte zań bilý testileriniń orny azaıyp, adamnyń biliktiligin synaý testiniń orny kúsheıe beredi»,- dedi ol.
