Memlekettik qyzmet salasyndaǵy jańa zań jahandaný zamanyndaǵy jańa synaqtarǵa jaýap beredi - Á. Báımenov
ASTANA. 26 naýryz. QazAqparat - Memlekettik qyzmet salasyndaǵy jańa zań jahandaný zamanyndaǵy jańa synaqtarǵa jaýap beredi.
Búgin Astanada QR Prezıdenti janyndaǵy Ortalyq kommýnıkatsııalar qyzmetiniń dástúrli aptalyq brıfınginde Memlekettik qyzmet isteri agenttiginiń tóraǵasy Álıhan Báımenov osylaı málim etti.
Sóz basynda agenttik tóraǵasy bıylǵy jyldyń qazaqstandyq memlekettik qyzmet salasy úshin erekshe bolǵanyn aıtty. Óıtkeni, búginnen bastap Elbasynyń saıası jigeriniń arqasynda Qazaqstannyń memlekettik qyzmetiniń jańa modeli óz ómirin bastaıdy.
«Qoǵamnyń óskeleń talabyna sáıkes, jahandaný zamanyndaǵy jańa synaqtarǵa sáıkes Elbasy memlekettik qyzmetti jetildirýdiń jańa basymdyqtaryn anyqtady. Búgingi kúshine enip otyrǵan zań osy jańa basymdyqtardy júzege asyrýdyń quqyqtyq negizderin qalap otyr», - dedi Á. Báımenov.
Sonymen birge tóraǵa búginnen bastap kúshine engen jańa zańnyń negizgi basymdyqtaryna da toqtalyp ótti. «Birinshiden, kadrlardy irikteý men joǵarylatýda merıtokratııa qaǵıdasyn kúsheıtý. Ekinshi - «A» basqarýshylyq korpýsyn qurý. Úshinshi - kadrlardy basqarý tetikterin jetildirý jáne kadr qyzmetiniń mártebesin arttyrý. Sonymen qatar, tártiptik etıkalyq baqylaýdy kúsheıte otyryp, korporatıvtik mádenıetti damytý», - dedi Á. Báımenov.
Onyń aıtýynsha, jańa zańdy júzege asyrý maqsatynda búgingi kúnge deıin Memleket basshysynyń 8 jarlyǵy qabyldanǵan. Ókiletti organnyń 4 normatıvti buıryǵy da kúshine endi.
