Memlekettik qyzmet salasynda ana tilimiz resmı tildiń tasasynda qalyp otyr - depýtat
«Búgingi ózekti másele, ol – memlekettik qyzmet salasyndaǵy qazaq tiliniń jaǵdaıy. Zańmen bekitilgen bıik mártebesine qaramastan, búgingi kúnge deıin memlekettik qyzmet salasynda ana tilimizdiń resmı tildiń tasasynda qalyp otyrǵany jasyryn emes. Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń 2017 jylǵy 21 aqpandaǵy №40 buıryǵyna sáıkes, memlekettik ákimshilik laýazymyna ornalasýǵa arnalǵan konkýrsty ótkizý qaǵıdasynda «Qazaqstan Respýblıkasynyń memlekettik tilin bilýge arnalǵan testileýden ótý úshin - mán belgilenbeıdi» dep jazylǵan. Demek bul, memlekettik qyzmetke ótý barysyndaǵy tapsyrylatyn testileýde qazaq tiliniń qajettiligi joq ekenin bildiredi», - dedi Memlekettik qyzmet isteri agenttigi tóraǵasynyń atyna depýtattyq saýal joldaǵan Samat Musabaev.
Mysaly onyń dereginshe, «B» korpýsynyń memlekettik qyzmetke ótý synaǵynda 9 normatıvtik-quqyqtyq aktiler boıynsha qamtylǵan 130 suraqtyń belgili bir mejesi kórsetilgen.
Al qazaq tilinen ótý mejesi aıqyndalmaǵan. Bul ana tilge degen qurmettiń múldem joqtyǵyn kórsetedi.
«Bizge túsiniksizdigi, memlekettik qyzmetke ótken azamattarǵa beriletin sertıfıkatta «Úmitker Qazaqstan Respýblıkasynyń memlekettik tili men zańnamalaryn bilýge arnalǵan testileýden sátti ótti» dep jazylady. Bul anyq kóz boıashylyq emes pe? Osyǵan oraı bizdiń usynysymyz memlekettik qyzmetke qabyldaý kezinde ótkiziletin testileý kezinde qazaq tili esepke alynyp, úmitker 100 paıyz memlekettik tilden oń nátıje shyǵarý kerek degen normalar engizilsin», - dedi Májilis depýtaty.
