Memlekettik qyzmet personalyn basqarýdyń «e-qyzmet» jańa Biriktirilgen aqparattyq júıesi tanystyryldy
ASTANA. 24 aqpan. QazAqparat - 23 aqpany kúni Qazaqstan Respýblıkasy Memlekettik qyzmet isteri agenttiginiń Memlekettik qyzmetti jetildirý máseleleri boıynsha saraptamalyq keńesiniń IV májilisi ótti.
Bul týraly Agenttiktiń baspasóz qyzmetinen habarlady. Májiliske QR Memlekettik qyzmet isteri agenttiginiń tóraǵasy Álıhan Báımenov, «Memlekettik qyzmettiń personalyn basqarý ulttyq ortalyǵy» AQ prezıdenti Aıdos Aqbýıýmov, «Qazaqstan Respýblıkasy Zańnama ınstıtýty» MM Lıngvıstıka ortalyǵynyń bastyǵy Nurzada Prımashev, úkimettik emes uıymdar, QR Prezıdentiniń janyndaǵy Memlekettik basqarý akademııasynyń ókilderi jáne depýtattar qatysty.
Keńes barysynda QR Memlekettik qyzmet isteri agenttiginiń «e-qyzmet» memlekettik qyzmet personalyn basqarýdyń jańa Biriktirilgen aqparattyq júıesi tanystyryldy. Ázirleýshilerdiń paıymdaýynsha, «e-qyzmet» tehnıkalyq tuǵyrnamasyn jasaý memlekettik qyzmet júıesindegi kadr saıasaty men adam kapıtalyn basqarý júıesiniń sapasy men tıimdiligin arttyrýǵa múmkindik beredi.
Sonymen qatar, Saraptamalyq keńeste memlekettik tildegi normatıvtik quqyqtyq aktilerdiń sapasyn arttyrý jónindegi sharalar tanystyryldy. QR Prezıdentiniń 2011 jylǵy 21 shildedegi «Qazaqstan Respýblıkasy memlekettik qyzmetiniń jańa modeli tujyrymdamasy týraly» № 119 Jarlyǵyn iske asyrý maqsatynda Agenttik «Memlekettik qyzmet týraly» Zańǵa ózgerister men tolyqtyrýlar engizý týraly» QR Zańynyń jobasyn ázirledi, ol qazirgi ýaqytta múddeli memlekettik organdarmen kelisýde jatyr. Atalmysh zań 2013 jyldyń 1 qańtarynan bastap qoldanysqa engiziledi.
