Memlekettik qyzmet kórsetýden bas tartýǵa qatysty biryńǵaı negizdemeler tizimi bekitiledi
ASTANA. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasy talqylandy.
Qujattyń maqsaty - memlekettik qyzmetter kórsetý salasyndaǵy zańnamany jetildirý, atap aıtqanda uǵymdyq aqparatty tolyqtyryp, zańnama deńgeıinde memlekettik qyzmetter kórsetýden bas tartýdyń negizderin birizdendirý bolyp tabylady.
«Konstıtýtsııaǵa sáıkes, adamnyń jáne azamattardyń quqy men bostandyǵy tek zań arqyly ǵana shekteledi. Sonyń ózinde de bul shekteýler konstıtýtsııalyq qurylymdy qorǵaý, qoǵamdyq tártipti saqtaý, basqa adamdardyń quqy men bostandyǵyn, halyqtyń densaýlyǵyn saqtaý maqsatynda zańdyq negizde ǵana qarastyrylady. Sondaı-aq, «Memlekettik qyzmetter týraly» qoldanystaǵy zańǵa sáıkes memlekettik qyzmet kórsetýden bas tartý úshin negizdemeler Qazaqstannyń zańdarymen belgilenedi. Degenmen, memlekettik qyzmetter kórsetý protsesin retteıtin qoldanystaǵy zańnamalarǵa ınventarızatsııa júrgizilgen bolatyn. Sonyń nátıjesinde birqatar memlekettik qyzmetter kórsetýden bas tartý negizdemeleri zańǵa táýeldi aktiler deńgeıinde júrgizilip kelgeni anyqtaldy», - dedi zań jobasy boıynsha baıandaǵan Ulttyq ekonomıka vıtse-mınıstri Aıdar Áriphanov.
Onyń aıtýynsha, zań jobasynda osyndaı olqylyqtardy boldyrmaý sharalary qamtylady. Máselen, memlekettik qyzmet kórsetýshi qyzmet kórsetýden bas tartqan jaǵdaıda bul jaıynda qyzmet alýshyǵa bas tartý sebepterin kórsete otyryp, jaýap joldaıtyn bolady. Budan bólek, memlekettik qyzmet kórsetýden bas tartýǵa qatysty biryńǵaı negizdemeler tizimi bekitiledi.
Zań jobasy palatanyń jalpy otyrysyna shyǵarylatyn bolady.
