Memlekettik qyzmet kórsetýde zańsyzdyqqa jol bergen 24 ákim jazalandy
ASTANA. QazAqparat - Ótken jyly QR Memlekettik qyzmet isteri jáne sybaılas jemqorlyqqa qarsy is-qımyl agenttigine memlekettik qyzmet alý kezinde quqyǵy buzylǵany týraly 1 446 shaǵym kelip túsken, dep habarlaıdy QazAqparat tilshisi agenttiktiń baspasóz qyzmetine silteme jasap.
«Negizinen mindettemelerin laıyqty deńgeıde oryndamaǵan, memlekettik qyzmet kórsetýden negizsiz bas tartqan jáne standarttar men reglamentterdi saqtamaǵan memlekettik organdardyń ústinen shaǵym túsken. Máselen, «Jaına» JShS shaǵymy boıynsha júrgizilgen tekserý jumystarynyń nátıjesinde aýyl sharýashylyǵy tehnıkasyn alýǵa qatysty ınvestıtsııalyq salym boıynsha sýbsıdııa berýden negizsiz bas tartý faktisi anyqtaldy. Investordyń ótinishi boıynsha aımaqtyq komıssııanyń sheshimi shyqqan. Ol sheshim boıynsha bas tartýǵa materıaldar men nysandardyń talapqa saı kelmeıtini sebep bolǵany jazylǵan. Alaıda mán-jaıdy anyqtaý úshin mamandar tartylmaǵan», - dep habarlandy agenttiktiń baspasóz qyzmetinen.
Aqyry, bul iske agenttik aralasyp, ótinish berýshige 13,2 mln teńge kóleminde sýbsıdııa berilip, osynyń arqasynda «Jaına» JShS óndirisin ulǵaıtyp, et naryǵyna shyqqan.
«Sol sekildi Qostanaı oblysyndaǵy laýazymdy basshylar A.A.Mashkoǵa jer ýchaskesin berýden negizsiz bas tartqan. Jospardan tys tekserýdiń nátıjesi boıynsha, shaǵym berýshiniń ýáji rastalǵan. Anyqtalǵandaı, A.A.Mashkonyń ótinishi 30 kúnniń ishinde qaralýy kerek bolǵanymen, ýaqytynda qaralmaı qalǵan. Agenttik aralasqannan keıin ǵana ótinish ıesine jer ýchaskesi berildi. Osyndaı olqylyqqa jol bergendikten, Qostanaı qalasynyń jer qatynastary basqarmasynyń basshysy laýazymynan bosatyldy», - delingen habarlamada.
Osyndaı faktiler ózge de aımaqtarda tirkelgen.
«Shaǵymdardy qaraý kezinde memlekettik organdar men vedomstvoaralyq uıymdardyń 253 qyzmetkeri tártiptik jaýapkershilikke tartyldy. Ótken jyly agenttik ÁQBtK 465-baby boıynsha 397 ákimshilik quqyqbuzýshylyq jóninde 397 hattama toltyryp, 203 laýazymdy qyzmetker sotqa tartyldy. Olarǵa 13,4 mln teńge kóleminde aıyppul salyndy», - delingen habarlamada.
Agenttiktiń habarlaýynsha, ákimshilik jaýapkershilikke ortalyq memlekettik organdardyń bólimsheleriniń 18 basshysy, 23 oblystyq basqarma basshysy, 24 qala, aýdan jáne aýyldyq okrýg ákimi, qalalyq jáne aýdandyq bólimderdiń 106 basshysy tartylǵan.
