Memlekettik qyzmet isteri agenttiginiń qoǵamdyq keńesi kezekti otyrysyn qorytyndylady
ASTANA. QazAqparat - Búgin Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigine qarasty Qoǵamdyq keńestiń kezekti otyrysy ótti. Bul týraly agenttiktiń baspasóz qyzmeti habarlap otyr.
Derekkózine súıensek, qoǵamdyq keńestiń búgingi otyrysynda eki basty másele, atap aıtsaq, 2015-2025 jyldarǵa arnalǵan sybaılas jemqorlyqqa qarsy is-qımyl baǵdarlamasynyń aıasyndaǵy sharalar men kóleńkeli ekonomıkaǵa qarsy is-qımyl sharalary jáne jemqorlyqqa qarsy zańnamalardy odan ári jetildirý máselesi talqylanǵan.
«Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi jergilikti jáne aýmaqtyq memlekettik organdardaǵy 2015-2025 jyldarǵa arnalǵan sybaılas jemqorlyqqa qarsy strategııasy men kóleńkeli ekonomıkaǵa qarsy is-qımyldy júzege asyrýǵa arnalǵan josparlaryn aldyn ala zerdeleý jumystaryn úzdiksiz júrgizip otyrady», - delingen baspasóz qyzmetiniń aqparatynda.
Jınalysqa qatysqan Agenttik tóraǵasynyń orynbasary Alık Shpekbaev kvazımemlekettik sektor arasynda sybaılas jemqorlyq kórinisterin joıý úshin agenttik tarapynan ulttyq kompanııalarǵa ózderine tıisti arnaıy sybaılas jemqorlyqqa qarsy josparlardy ázirleýge jáne ony bekitýge, sondaı-aq korporatıvtik basqarý, kadrlyq saıasatqa merıtokratııa qaǵıdattaryn engizýge jáne jemqorlyqqa qarsy turaqty túrde monıtorıng jumystaryn júrgizip turýǵa birqatar usynymdar berilgendigin atap ótti.
Aıta keteıik, agenttik tóraǵasy Q.Qojamjarovtyń buıryǵymen syrtqy monıtorıng jumystarymen aınalysatyn top quramy bekitilip, onyń basshysy bolyp «Qazaqstannyń Azamattyq alıansynyń» prezıdenti Nurlan Erimbetov taǵaıyndalǵan bolatyn.
«Osy monıtorıng jumystarynyń qorytyndysy memlekettik organdardyń esepterin negizge ala otyryp, sondaı-aq, sybaılas jemqorlyqqa qarsy strategııanyń oryndalý barysy boıynsha Memleket basshysynyń Ulttyq baıandamasyna jınaqtalady. Memleket basshysyna atalǵan esepterdi qaraý úshin usynylǵan soń, buqaralyq aqparat quraldaryna jarııalanatyn bolady», - dedi tóraǵa orynbasary A.Shpekbaev.
Jınalysty qorytyndylaı kele, Qoǵamdyq keńestiń tóraǵasy Qaıyrbek Súleımenov 2015-2025 jyldarǵa arnalǵan sybaılas jemqorlyqqa qarsy strategııany kezeń-kezeńimen júzege asyrýǵa arnalǵan is-sharalar jospary - aldyńǵy 2011-2015 jyldardaǵy jemqorlyqqa qarsy salalyq baǵdarlamada oryndalǵan jumystardyń kemshilikterine jasalynǵan tereń taldaý nátıjesi eskerilgendigin aıtty.
