Memlekettik qyzmet isteri agenttiginde ótken ashyq esik kúnine 1,7 myń adam keldi
Vedomstvonyń baspasóz qyzmetiniń málimetinshe, agenttikte, onyń aýmaqtyq bólimshelerinde jáne Sybaılas jemqorlyqqa qarsy is-qımyl ulttyq bıýrosy, «Memlekettik qyzmettiń personalyn basqarý ulttyq ortalyǵy» AQ-da ashyq esik kúni ótti. 
Shara barysynda qatysýshylarǵa agenttik qyzmetkeriniń is júzindegi jumystary tanystyrylyp, agenttiktiń negizgi baǵyttary boıynsha túsindirildi. Sonymen qatar, tıisti ádistemelik jáne quqyqtyq kómek kórsetildi.
«Kelýshilerdi sybaılas jemqorlyqpen kúres, memlekettik qyzmet sapasyn arttyrý, memlekettik qyzmetke qabyldaný jaıy qyzyqtyrdy.
Agenttiktiń árbir qurylymdyq bólimshesiniń basshylary ózderi jaýapty departamenttiń qyzmetimen tanystyrdy, tolyǵyraq kúndelikti oryndalatyn bıznes-protsessterge toqtalyp, túsken árbir suraqqa naqty jaýap qaıtardy.
Kelýshilerdiń qatarynda joǵary oqý oryndarynyń stýdentteri kóp boldy, Olar mansaptyq ósý, memlekettik organdarda kóp suranysqa ıe mamandyq tizimin surady. Jastardyń basym bóligi aldaǵy ýaqytta bos laýazymdar konkýrsyna qatysýǵa nıetti ekenderin jasyrmady», delingen habarlamada.
Sybaılas jemqorlyqqa qarsy is-qımyl ulttyq bıýrosynda ótken ashyq esik kúnine kelgenderdi jedel-tergeý jumysy, jemqorlyq týraly habarlaǵandarǵa syıaqy taǵaıyndaý, sybaılas jemqorlyq qylmystaryn ashý tásilderi, sondaı-aq jemqorlyq faktileri boıynsha ótinishti berý quraldary qyzyqtyrdy.
«Jalpy respýblıka boıynsha atalǵan sharaǵa 1 700-den astam adam qatysty.
Bul sharany ótkizý memlekettik organ men halyq arasynda senimdi qatynastyń ornaýyna septigin tıgizdi, sonymen qatar, agenttiktiń aıqyndyq jáne ashyqtyq jolyn ustanatyndyǵyn taǵy da bir kórsetti», delingen habarlamada.
Baspasóz qyzmetiniń habarlaýynsha, agenttik ashyq esik kúnderin ótkizý aldaǵy ýaqytta da jalǵasyn tabady.
Esterińizge sala keteıik, árbir azamat 1424 Call-ortalyǵy (qońyraý shalý tegin) habarlasý arqyly memlekettik qyzmet, memlekettik qyzmetshilerdiń ádep erejesin saqtaýy, memlekettik qyzmetter sapasy týraly biryńǵaı keńes ala alady, sondaı-aq sybaılas jemqorlyq faktileri týraly habarlaý múmkindigi bar.