Memlekettik qyzmet isteri agenttigi jańajyldyq syılyqtyń baǵasy 3200 teńgeden asyp ketpeýin eskertti – BAQ-qa sholý

***

«Qazaq tili jappaı qoldanys tiline aınalyp, shyn mánindegi memlekettik til mártebesine kóterilgende, biz elimizdi Qazaq memleketi dep ataıtyn bolamyz». (Qazaqstan Respýblıkasynyń Prezıdenti - Elbasy N.Á.Nazarbaevtyń
«Qazaqstan-2050» Strategııasy - qalyptasqan memlekettiń
jańa saıası baǵyty» Joldaýynan).    

«Týra osylaı aıtyldy. Elbasymyz aıtty. Joldaýda aıtty. Buǵan qalaı shalqymassyń, qalaı shattanbassyń! Alash balasynyń bári osy sózdi estigeli beri bir-birinen súıinshi surasqandaı kóńil kúıde. Biz elimizdiń jańa atqa ıe bolatyn kúnin qaıtkende tezdete alatynymyzdy da Elbasymyz naqty kórsetip otyr. Ol úshin ana tilimiz - táýelsiz elimizdiń memlekettik tili ómirdiń barlyq salasyna deńdeı enip, barsha jurttyń suranysyna ıe bolýy kerek, jappaı qoldanys tiline aınalýy kerek. Ondaı kún de keledi áli. Osyndaı tusta biz halqymyzdyń abyroıyn asyryp, aıdynyn tasytqan jasampazdyq qujat - «Qazaqstan-2050» Strategııasyn ómirge  ákelgenge deıin elimizdiń qandaı-qandaı joldardan ótkenin kóz aldymyzǵa keltirip, oıǵa batamyz»,-dep jazady «Egemen Qazaqstan» gazetindegi maqalasynda jazýshy,   QR Parlamenti Senatynyń depýtaty Jabal Erǵalıev. Bul maqala kópshilik nazaryna «Qazaq memleketi ataný bizdiń óz qolymyzda» degen taqyryppen usynylyp otyr.

Osy basylymnyń jazýynsha, keshe Qaırat Mámıdiń tóraǵalyq etýimen bolǵan Senat bıýrosynyń otyrysynda Prezıdent N.Á.Nazarbaevtyń «Qazaqstan-2050» Strategııasy - qalyptasqan memlekettiń jańa saıası baǵyty» Joldaýyn iske asyrý jónindegi jo­ǵar­ǵy palatanyń Іs-sharalar jospary qaralyp, bekitildi, dep habarlady Parlament Senatynyń baspasóz qyzmeti. Josparda Joldaýdy zańna­ma­­lyq turǵyda qamtamasyz etý, onyń negizgi erejelerin túsindirý jáne nasıhattaý,­ son­daı-aq, strategııada­ belgilengen syrtqy saıası­ mindetterdi júzege asyrý jó­nindegi taraýlar bar. Bıýro, sonymen qatar, Senat­tyń 2013 jylǵa arnalǵan Negizgi is-sharalar josparyn bekitti. Bul qujatta Memleket basshysynyń bastamalaryn iske asyrýdaǵy zań shyǵarý jumystarynyń baǵyttary men parlamenttik bir­qatar iri sharalardy - úki­met saǵattaryn, turaqty ko­mı­tetterdiń kóshpeli otyrystaryn, dóńgelek ústel­der, konferentsııalar ótkizý kórinis tapqan. 

***

«Aıqyn» gazetinde «Qazaqsha ınternette «jarylys» bolar kún jaqyn» degen taqyryppen maqala berildi.  Qazaqsha ınternette «jarylys» bolar kún alys emes. Buǵan elordada tuńǵysh ret ótken «Astana ınternet-forýmy - 2012» respýblıkalyq forýmynda kóz jetti. Forýmǵa aqparattyq tehnologııa mamandary, aqparattyq tehnologııaǵa qyzyǵatyn stýdentter, muǵalimder, oqýshylar, tipti aqparattyq tehnologııa salasyna qatysy bar kez kelgen eriktiniń qatysyp, qazaqsha ınternetti damytýdyń joldaryn qarastyrýy, óz tájirıbelerimen bólisip, usynys tastaýy kóńilimizdi bir serpiltip tastady. Eń bastysy, ınternet-forým taza qazaq tilinde ótti. Munyń ózi «qazaq tili tehnologııa tili emes» degen syńarjaq pikirdiń kúl-talqanyn shyǵardy. 

«Jańa jyl qarsańynda Memlekettik qyzmet isteri jónindegi agenttik tóraǵasynyń orynbasary Saıan Ahmetjanov «jańajyldyq syılyǵyńyzdyń baǵasy eki aılyq eseptik kórsetkish - 3200 teńgeden asyp ketpesin» dep aıdy aspannan bir-aq shyǵardy»,-dep jazady «Aıqyn» «Syılyqtyń baǵasy - 3200 teńge» atty materıalda.  Tóraǵa orynbasarynyń aıtýyn­sha, onyń baǵasy shekten asyp ketse, ákimshilik jazaǵa tartylýyńyz múm­kin. Sondyqtan syılyq almas­tan buryn, onyń baǵasyn bilip alǵany­ńyz jón. Baıqamaı júrip, baǵaly syı­lyq alyp qalǵandar jeti kún­niń ishinde bastyǵyna eskertip, ony arnaıy memlekettik qorǵa tapsyrý kerek.

Tóraǵa orynbasarynyń joǵa­rydaǵy pikiri «qaıtqan malda qaıyr bar» degen qazaqtyń maqalyn eske túsiredi. Biraq qaıtqan maldyń basyn qazynaǵa qaraı buryp otyratyn memlekettik qor týraly estigen-kór­gen jan bolmaı shyqty. Onyń dere­gin bilmek bolǵan áreketimizden túk shyqpady. Bul jaıly, tipti «Nur Otan» HDP janyndaǵy Jemqorlyqqa qarsy kúres jónindegi qoǵamdyq keńestiń tóraǵasy, senator Oralbaı Ábdikárimov te bilmeıdi eken. «Kúni búginge deıin jeke syı­lyǵymnyń quny kúmándi dep ony memleketke keri qaıtaryp otyrǵan sheneýnik jaıly da, ony keri qaı­taryp alatyn qor jaıly da estigen joqpyn. Qoǵamdyq sananyń deń­geıi oǵan kóterilý úshin bizge áli talaı jumys isteý kerek. Bizde zań­ǵa qulaq aspaıtyndar memleket­tik sheneýnikterdiń arasynda da, jeke sektorda da óte kóp», - deıdi. 

*** 

«Ákesin sabaǵandy kórdik, biraq arbaǵa baılap qoıyp sabaǵandy kim kóripti?» demekshi, adamnyń ishki aǵza múshelerin bólshektep satý bylaı tursyn, endi tutas adamdy saýdalaý asqynyp tur. Bulaı deýimiz - negizsiz emes. Kúni keshe «bıyl elimizde 100-ge tarta tulǵa adam saýdasy men adam urlaý faktileri boıynsha sottaldy» degen derek ǵalamtorda jarq ete qaldy. Muny halyq qalaýlysy Aıgúl Nurkına hanym Májilis otyrysynda málim etipti. Úıinen shyǵa izi-qaıym joǵalatyn bozbala men boıjetkenderdiń, er-azamat pen áıel-analardyń obaly kimge?!»,-dep jazady «Alash aınasy» basylymy búgingi sanynda. Etek jaıǵan kóp qylmystardyń qataryna «adam saýdasy» kelip qosyldy. Kádimgideı tolyqqandy qylmys retinde tóbe kórsetip, qara kóbeıtip úlgerdi. Oǵan depýtat hanymnyń keltirgen derekteri dálel. Depýtat hanym «Aǵymdaǵy jyldyń 10 aıynda 231 qylmystyq is osy adam saýdasyna qatysty qozǵalǵan. Olardyń ishinde 4-eýi jumysqa zańsyz jegýge qatysty adam urlaý bolsa, 13-i jumysqa salý maqsatynda adamdy zańsyz bas bostandyǵynan aıyrýǵa, 21-i adam saýdasyna qatysty bolyp otyr. 35 oqıǵa jezókshelikpen aınalysýǵa májbúrleý maqsatynda adam urlaý bolsa, onyń 11-i kámeletke tolmaǵandar bolyp shyqqan. 158 qylmystyq is prıtondar uıymdastyrý men olardy ustaýǵa qatysty qozǵaldy», - depti. Bul maqala «Adam saýdasy órship tur» degen taqyryppen jaryq kórdi. 

«Alash aınasy» gazetiniń búgingi sanynda «Atyraýda 90 otbasy úısiz qaldy» atty maqala basylyp shyqty. Basylyshmnyń jazýynsha, qystyń kózi qyraýda toqsan otbasy dalada qaldy. Atyraýdaǵy Hımıkter poselkesinde ornalasqan bes qabatty jataqhananyń edeni opyrylyp, jertólege tústi. Japa shekkender joq, turǵyndar úı mańyndaǵy mekteptiń sport zalyna qonystandyryldy. Alaıda oqıǵa ornyna kelgen qala ákimi men laýazymdy tulǵalar bul mekendi apatty úıler qataryna qosýǵa asyǵar emes.

Oqıǵanyń mán-jaıyna toqtalsaq, alǵashynda 22 jeltoqsan kúni jataqhananyń úsh bólikten turatyn edeniniń bir bóligi opyrylyp túsken, araǵa eki kún salyp ekinshi bóligi de jermen-jeksen boldy. 90 jyldary paıdalanýǵa berilgen bul qurylysshylar jataqhanasynyń búginde ıesi de joq.