Memlekettik qyzmet isteri agenttigi «Tyńdaý» biregeı jobasyn iske qosty

NUR-SULTAN. QazAqparat - QR Memlekettik qyzmet isteri agenttigi árbir azamattyń memlekettik qyzmetti jetildirýge jáne qoljetimdi tsıfrlyq memleketti qurýǵa úles qosýyna múmkindik beretin «Tyńdaý» biregeı jobasyn iske qosty. Bul týraly atalǵan agenttiktiń tóraıymy Anar Jaıylǵanova Facebook paraqshasynda jazdy, dep habarlaıdy QazAqparat tilshisi.

​«Memleket basshysy óziniń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa Joldaýynda «Halyq únine qulaq asatyn memleket» tujyrymdamasy barlyq azamattardyń ótinishine jedel jáne tıimdi áreket etýge baǵyttalýy tıis ekenin atap ótti. Bul rette Prezıdent memlekettik apparat qyzmetindegi problemalar kóbinese azamattar men jergilikti jerlerdegi memlekettik qyzmetkerler arasyndaǵy keri baılanystyń bolmaýyna baılanysty ekendigine nazar aýdardy. ​«Halyq únine qulaq asatyn memleket» – bul barynsha ashyq jáne esepti memleketti qalyptastyrý. Sondyqtan memlekettik apparat ár sala boıynsha birinshi kezekte halyqtyń pikirin barynsha eskerýi tıis», - deıdi agenttik tóraıymy.

Onyń atap ótýinshe, «Tyńdaý» jobasy erikti qoldanýshylar pikiri aıasynda qurylǵan. Jobaǵa qatysý úshin elektrondy qyzmetti alý talap etiledi jáne barlyǵyn tyndau.kz siltemesi boıynsha onlaın-saýalnamada belgileı otyryp, onyń árbir qadamyn baǵalaý qajet.

«Budan bólek, agenttik tek memlekettik qyzmetterge shaǵym jınamaıdy. Bizdiń negizgi maqsatymyz – problemaly jerlerdi anyqtap, tıimdi keri baılanys ornatý. Jınaqtalǵan máseleler bazasyna taldaý jasap, memlekettik organdarǵa qajetsiz qadamdardy joıý, halyqtyń memlekettik qyzmetterdi alý protsesterin jeńildetý boıynsha naqty usynystar beretin bolamyz. Ótken aptada biz «Tyńdaý» jobasyn iske qostyq jáne probatsııalaý maqsatynda eki qyzmetti tańdap aldyq. Olar - tólqujat pen jeke kýálikti alý qyzmeti. Qazirgi ýaqytta osy baǵyt boıynsha azamattardan usynys jınaý jalǵasýda. Búgin osy joba aıasynda eriktilerdiń ishinen alǵashqy fokýs-top quryldy jáne usynystar jınalyp jatyr», - dedi ol.

Agenttik basshysynyń aıtýynsha, «elektrondyq úkimet» portalynda jumys protsesterin jaqsartý úshin avtomatty túrde terý jáne tek JSN-di tergen kezde azamattyń derekterin (aty-jóni, týǵan jyly men jeri) tartýǵa qol jetkizetin jasandy ıntellekt negizinde arnaıy qosymshalar, júkteletin skanerlengen qujattar men fotosýretterdi (3h4) júıege qajetti formattarǵa avtomatty túrde keltirý úshin túrlendirýge arnalǵan kómekshi qosymshalar boıynsha usynystar ázirlendi.

Sondaı-aq avtomattandyrylǵan qyzmetterdiń jumysqa qabiletin testileý, ETsQ nemese bir ret qoldanylatyn parol kómegimen avtorızatsııalaý nemese qol qoıý kezinde týyndaıtyn aqaýlar anyqtalady.

«Aldaǵy ýaqytta elektrondyq qyzmetter boıynsha tıisti materıaldardyń jınalýyna qaraı azamattardyń usynystary múddeli organdarmen birlesip, kórsetiletin qyzmetti alýshylardy habardar ete otyryp, pysyqtalatyn bolady. Biz jaqyn ýaqytta «Tyńdaý» halyqtyń pikirin eskeretin tıimdi joba bolady dep úmittenemiz», - dedi Anar Jaıylǵanova.